У аграгарадку Уборак на Лоеўшчыне ўжо звыш 22 гадоў працуе цэнтр рамёстваў

У свой час цэнтр быў створаны ў будынку СДК ініцыятарамі, творча апантанымі землякамі Уладзімірам Бабраўнічым, Валянцінай Бярнацкай, Фёдарам Блізняцом. Цяпер загадчыкам філіяла «Уборкаўскі цэнтр рамёстваў» пры сельскім цэнтры культуры і вольнага часу працуе Наталля Чуўюрава. Разам з метадыстам Наталляй Палівач яны ствараюць з жытнёвай, ячнай і пшанічнай саломкі сапраўдныя дзівосы. Іх сонечныя карціны-аплікацыі, пано, шматлікія бытавыя вырабы – кошыкі, куфары, вазы, шкатулкі і, безумоўна ж, кветкі, цуда-птушкі з’яўляюцца ўпрыгожаннем выстаў, гарадскіх святаў. Здорава, што гэтае рамяство застаецца і сёння ў пашане ў 8–14-гадовых уборкаўскіх школьнікаў: многія наведваюць заняткі, пераймаюць навыкі ў майстрых Чуўюравай і Палівач.

– Сёлетняе сонечнае надвор’е добра паўплывала на нашу сыравіну, – зазначае Наталля Чуўюрава. – Нарыхтавалі больш жытняй саломкі з суседніх з Уборкам палёў. Сапраўды залатыя вырабы атрымліваюцца!

Майстрыхі ўжо бралі ўдзел у выставах на святах у Хойніках, Гомелі, Акцябрскім, Ельску. А ў кастрычніку па доб­рай завядзёнцы парадуюць землякоў у райцэнтры Лоеў.