Выстава жывапісу «Мільярд шчаслівых сустрэч» Наталлі Алейнікавай пачала дзейнічаць у бібліятэцы № 3 Мінска

– Спачатку я расказала натхняльную гісторыю стварэння сваіх кніг, прачытаўшы вершы з першых знакавых публікацый у часопісах «Нёман», «Маладосць», газетах «ЛіМ», «Гомельская праўда», «Маяк Палесся» і афарызмы з новых публікацый пра сямейныя каштоўнасці, надрукаваныя ў беларускім альманаху «Доблесць» і часопісе «Берагі» з Калінінграда.

Прадэманстравала на экране слайды публікацый аб маёй творчасці ў некаторых выданнях. Госці ўбачылі аўтарскія пейзажы: краявіды, выкананыя мастацкім алеем на палотнах і кардоне, частка якіх з'яўляецца ілюстрацыямі да маіх кніг. У аўтарскіх творах шырока паказана хараство палескай прыроды.

Прыгожым гучаннем паэзіі аб прыроднай прыгажосці роднага краю, у якой услаўляюцца «угоддзі з сакавітай канюшынай…», «высакародны Дняпро...», «магутныя дубы ў разлівах рэчкі…», «ізумрудныя кроны…», «жыватворная крыніца ў скарбонцы Вечнасці…», напоўнілася прастора сталічнай бібліятэкі.

Адбылася прэзентацыя новай песні «Хараство» на верш «Ціўкаюць раннія птахі ў балоце…». Усплёск жыццярадасных эмоцый у мяне здарыўся з навучэнцамі малодшых класаў мясцовай сталічнай школы № 142: абаяльная атмасфера дзяцінства, багацце ўрачыстасці юнацтва.

Я шчаслівы пісьменнік, у захапленні. Свята жывапісу і кніг атрымалася карысным для мяне і прысутных, я ўбачыла, як свецяцца шчырай радасцю вочы і атрымала добрыя водгукі ад людзей аб сваёй выставе. Увасобілася маё новае добрае мерапрыемства, і я шчыра ўдзячна, што людзі сапраўды адчулі маю паэтычную энергетыку.

Выстава праходзіць у бібліятэцы № 3 імя У. У Маякоўскага па 4 снежня.

Аб аўтары: Наталля Алейнікава – паэт, пісьменнік, мастак-ілюстратар, фатограф. Нарадзілася на Палессі, жыве ў Мінску. Адукацыя вышэйшая, факультэт прыкладной псіхалогіі БДПУ імя М. Танка. Выдадзены кнігі паэзіі «Ажыццяўляюся табою…» (у серыі «Мінскія Маладыя Галасы» Саюза пісьменнікаў Беларусі, 2018) і афарызмаў «Мысли вслух…» (2019) з пейзажным жывапісам.

Лаўрэат I ступені V Міжнароднага маладзёжнага фестывалю-конкурсу паэзіі і паэтычных перакладаў «Берега дружбы». Удастоена падзякі за ўвасабленне мастацка-паэтычнага праекта «У святліцах Палесся!..». Удзельніца мастацкай сустрэчы «Гармонія архітэктуры», арганізаванай да юбілейнага 20-годдзя ўключэння «Замкавага комплексу Мір» у спіс Сусветнай культурнай і прыроднай спадчыны ЮНЕСКА. У Алейнікавай адбыўся шэраг выстаў жывапісу і фатаграфіі, прэзентацыя кнігі.