Пішуць пра тое, што хвалюе. На выніковым сходзе пісьменнікаў Гомельшчыны падведзены вынікі працы літаратараў за апошняе пяцігоддзе

Старшыня абласнога аддзялення Саюза пісьменнікаў Беларусі, заслужаны дзеяч культуры Рэспублікі Беларусь, вядомы празаік і публіцыст Уладзімір Гаўрыловіч акрэсліў творчыя набыткі грамадскай арганізацыі. Паэты, празаікі, публіцысты, драматургі сваімі творамі ўслаўляюць народны подзвіг у гады Вялікай Айчыннай вайны, годна пішуць пра тое, што хвалюе ў неспакойным XXI стагоддзі. На Гомельшчыне з 2013 года ў адпаведнасці з рашэннем аблвыканкама лепшыя творы намінантаў адзначаюцца літаратурнай прэміяй імя Кірылы Тураўскага і выдаюцца.

Абласная пісьменніцкая арганізацыя ўдзельнічае ў міжнародных праектах «Берагі дружбы» і «Сожскія берагі дружбы»: беларускія і расійскія паэты перакладаюць лепшыя творы сучаснікаў, маладых аўтараў, а па выніках сустрэч на Гомельскай і Растоўскай зямлі выдаюцца зборнікі. Плённа супрацоўнічаюць пісьменнікі краю з бібліятэкамі, школамі, вышэйшымі навучальнымі ўстановамі, Гомельскай епархіяй Беларускай праваслаўнай царквы. Найвышэйшае прызнанне ў апошнія гады займелі ў чытачоў кнігі празаіка Уладзіміра Гаўрыловіча, паэтаў Соф’і Шах і Мікалая Ждановіча, уганараваныя Нацыянальнай літаратурнай прэміяй.

Пісьменнікі рэгіёна, несумненна, будуць і надалей творча спрыяць ажыццяўленню Праграмы сацыяльна-эканамічнага развіцця Беларусі ў гэтай пяцігодцы ў межах падпраграмы «Культурная прастора», памятаючы аб сваёй адказнасці за Слова, за якасць напісаных твораў. 2026 год аб’яўлены абласным аддзяленнем Годам патрыятычнай творчай моладзі.

На сходзе аўтару выдадзеных дзесяці кніг прозы, жыхару Мазыра Ігару Шэлегу, які служыць ва Узброеных Сілах Рэспублікі Беларусь, уручаны членскі білет Саюза пісьменнікаў Беларусі. Старшынёй абласнога аддзялення Саюза пісьменнікаў абраны Уладзімір Гаўрыловіч.