«Прывядзём ва ўзорны парадак санітарнае становішча вобласці». Аб чым пісала «Гомельская праўда» ў 1945-м

У выкананне рашэнняў Гомельскага аблвыканкама і гарвыканкама аб правядзенні месячніка па ачыстцы населеных пунктаў вобласці ад смецця і прывядзенне іх ва ўзорнае санітарнае становішча быў праведзены нядзельнік у Гомелі, які паказаў, што пры вядомым намаганні гараджан вуліцы і двары сталі больш чыстымі і ахайнымі.

Аднак цэлы шэраг прадпрыемстваў горада знаходзіцца яшчэ ў антысанітарным становішчы, асабліва гэта з’ява нецярпіма на харчовых аб’ектах.

Сталовая завода імя Кірава, а таксама ліцейна-механічнага завода знаходзяцца ў антысанітарным становішчы. Брудныя памяшканні гэтых сталовых могуць стаць крыніцай страўнікавых захворванняў рабочых. У дрэнным стане знаходзяцца і рынкі горада. Не хапае сталоў, ларкоў, няма нагляду за прыгатаванай гарачай ежай, якая паступае на рынак праз прыватных асоб.

Сур’ёзную небяспеку для страўнікава-кішэчных захворванняў прадстаўляюць забруджаныя ўчасткі разбураных дамоў і каробак.

Гомельскі камунальны аддзел абавязаны ў найкарацейшыя тэрміны выканаць рашэнне аблвыканкама і гарвыканкама аб наладжванні грамадскіх прыбіральняў па Савецкай, Камсамольскай і іншых вуліцах і арганізаваць асенізацыйны абоз. Строгі нагляд патрэбна ўстанавіць за крыніцамі водазабеспячэння, сістэматычна хларыраваць ваду, трымаць у парадку калонкі і калодзежы.

Справа ўсіх гамяльчан навесці ў горадзе ўзорную чысціню, прыцягваючы да гэтай работы грамадскіх санітарных інспектараў, вулічкомаў, вучняў, а на сяле – сельскі актыў.

Доўг кожнага ўрача, сярэдняга медработніка выступаць перад працоўнымі з лекцыямі і гутаркамі на тэмы папярэджвання брушнога тыфу і дызентэрыі – змагацца за чысціню гарадоў і сёл нашай вобласці.

А. МАЎШОВІЧ. «Гомельская праўда», 30 красавіка 1945 года