Прыгажэюць гарадскія вуліцы

Кожную раніцу ў гэтыя дні генеральны дырэктар камунальнага праектна-рамонтна-будаўнічага унітарнага прадпрыемства “Гомельаблдарбуд” В. М. Краўчанка заязджае перад работай на тую з гарадскіх вуліц, дзе іх падраздзяленнямі вядзецца рамонт і рэканструкцыя дарог. Цікавіцца патрэбамі і праблемамі работнікаў, тым, якую дапамогу трэба тэрмінова аказаць, каб не выбіцца з намечаных графікаў і працаваць якасна, высокаэфектыўна. Не сакрэт, што на дрэнны стан гарадскіх дарог шмат нараканняў, асабліва з боку вадзіцеляў.
— У апошнія гады ў Гомелі, ды і ў іншых гарадах вобласці, недастаткова ўдзялялася ўвагі капітальнаму рамонту і добраўпарадкаванню вуліц і дарог, — гаворыць В. М. Краўчанка. — Таму яны і прыходзілі ў непрыглядны выгляд. Зараз становішча па-праўляецца. Штодзённа вядзем работы шырокім фронтам.
Апрача Гомельскага дарожна-будаўнічага ўпраўлення № 113, на рамонце гомельскіх дарог задзейнічаны падраздзяленні Добрушскага ДРБУ-150 і Рэчыцкага
ДРБУ-149. Работа вядзецца на працягу ўсяго светлавога дня.
— Стаўку робім на лепшыя тэхналогіі, — расказвае начальнік аддзела якасці, стандартызацыі і метралогіі прадпрыемства Р. Е. Гурэвіч. — Напрыклад, на пакрыцці дарог выкарыстоўваецца асфальтабетон з прымяненнем кубавіднай шчабёнкі, што павышае ўстойлівасць і трываласць дарог.
У рабоце задзейнічана навейшая тэхніка, якую, нягледзячы на фінансавыя цяжкасці, пастаянна набывае “Гомельаблдарбуд”. Зараз, напрыклад, выкарыстоўваюцца чатыры каткі, дваццацітонны самазвал “Волат”, іншыя новыя спецмашыны.
У выніку сумеснай арганізаванай і высокаэфектыўнай работы на вачах мяняецца аблічча нашых вуліц. За кароткі тэрмін поўнасцю адрамантавана цэнтральная дарога ў Навабеліцы, значная частка дарогі па вуліцы Савецкай і іншыя.