Гаспадаркі Гомельшчыны практычна завяршылі ўборку сланечніка і соі

Як паведамілі ў камітэце па сельскай гаспадарцы і харчаванню аблвыканкама, на сёння сланечнік убраны на плошчы звыш 17,5 тысячы гектараў, што складае 99,8% плану, соя — 11,5 тысячы гектараў (99%). Намалот насення сланечніка склаў 17,9 тысячы тон пры сярэдняй ураджайнасці 10,2 цэнтнера з гектара, соі — 10,9 тысячы тон (9,5 цэнтнера з гектара). Як вядома, сёлета аграрыі Гомельшчыны праводзілі своеасаблівы эксперымент па вырошчванню на прамысловай аснове традыцыйна паўднёвых культур, з ліку якіх соя і сланечнік. Можна сказаць, што эксперымент удаўся. Ужо ясна, што стратэгічны курс абраны правільны: сланечнік і соя дапамогуць вырашыць праблему забеспячэння галіны бялком уласнай вытворчасці. Па меркаваннях навукоўцаў, клімат нашай вобласці ўжо набліжаны па сваіх параметрах да паўночнай часткі Украіны.