80 устаноў адукацыі плануецца аптымізаваць у Гомельскай вобласці ў 2014 годзе

Як паведаміла начальнік планава-эканамічнага аддзела ўпраўлення адукацыі аблвыканкама Валянціна Салавей, 30 устаноў будзе ліквідавана. У прыватнасці, закрыюць дзіцячы садок у Калінкавіцкім раёне, 10 школ у Ельскім, Жыткавіцкім, Калінкавіцкім, Лельчыцкім і Рагачоўскім раёнах. Спыняць сваю дзейнасць 16 міжшкольных камбінатаў працоўнага навучання. Закрыюцца ўстановы дадатковай адукацыі дзяцей і моладзі ў Калінкавіцкім і Петрыкаўскім раёнах. Таксама на Петрыкаўшчыне перастане дзейнічаць адна ўстанова спецыяльнай адукацыі.

Акрамя таго, на Гомельшчыне рэарганізуюць 4 дашкольныя дзіцячыя ўстановы, 41 школу і 5 устаноў дадатковай адукацыі.

– Гэта не значыць, што выхаванцы і школьнікі згубяць магчымасць навучання і наведвання гурткоў і творчых аб’яднанняў, – адзначае Валянціна Мікалаеўна. – Усе функцыі ўстаноў будуць захаваны, зменіцца толькі іх статус. Напрыклад, дзіцячыя садкі аб’яднаюць з школамі, а ўстановы дадатковай адукацыі ў выніку рэарганізацыі стануць больш функцыянальнымі. Так у Добрушскім раёне плануецца аб’яднаць цэнтр творчасці дзяцей і моладзі з цэнтрам тэхнічнай творчасці дзяцей і моладзі. Пры гэтым усе накірункі захаваюцца, а таму выхаванцам і іх бацькам не трэба хвалявацца: вольны час дзяцей будзе насычаным і цікавым, як і раней.