У Гомелі падвялі вынікі заключнага этапу рэспубліканскай алімпіяды

У інтэлектуальных спаборніцтвах прынялі ўдзел 203 вучні з усіх устаноў агульнай сярэдняй адукацыі вобласці. Рабяты спрабавалі свае здольнасці па 16 вучэбных прадметах.

Дыпломы пераможцаў атрымалі 96 чалавек, такім чынам наша вобласць стала першай у рэспубліцы. Лепшых вынікаў дасягнулі вучні гарадскіх устаноў сярэдняй адукацыі Савецкага раёна Гомеля (21 дыплом), Светлагорскага раёна (14 дыпломаў), Чыгуначнага раёна Гомеля (11 дыпломаў), Жлобінскага раёна (8 дыпломаў) і Мазырскага раёна (5 дыпломаў).

Сярод пераможцаў былі адзначаны прадстаўнікі невялікіх сельскіх раёнаў – Буда-Кашалёўскага, Веткаўскага, Гомельскага, Жыткавіцкага і Ельскага.

53 дыпломы атрымалі вучні гімназій і ліцэяў. Лідарамі сярод устаноў адукацыі сёлета названы гімназія г. Светлагорска, Гомельскі абласны ліцэй, гімназіі №51 і №46 г. Гомеля, СШ №13 г. Жлобіна і Гомельскі гарадскі ліцэй №1.