З калгаснага поля на прысядзібныя ўчасткі

Сельскагаспадарчы вытворчы кааператыў “Калгас “50 год БССР”
на гэтым тыдні першым у Калінкавіцкім раёне закончыў жніво.
— Гэтая гаспадарка ў ліку першых у раёне выбарачна і пачынала ўборку збожжавых і зернебабовых культур, — па дарозе ў кааператыў, які знаходзі-цца ад Калінкавіч больш як за 30 кіламетраў, расказваў мне начальнік раённай інспекцыі дзяржтэхнагляду С. А. Даніленка. — Тут своечасова і добра падрыхтавалі да работы ўсе восем камбайнаў і высокапрадукцыйна эксплуатавалі іх. Жніво вялі з апярэджаннем графіка і паспяхова завяршылі.
Ужо на месцы старшыня кааператыва А. І. Гаркуша да слоў Сяргея Арсенцьевіча дадаў, што ўсе камбайнеры працавалі добра. Ды гэта і зразумела. Апрача таго, што для плённай работы былі створаны неабходныя ўмовы, дык яшчэ і за кожную тону намалочанага збожжа налічвалася 1377 рублёў. Гэта больш, чым у іншых гаспадарках, дзе раней мне даводзілася бываць.
Найбольш высокіх намалотаў да-біліся экіпажы ў саставе Міхаіла Жолуда і Мікалая Каробкі, а таксама Васіля Гойчыка і Дзмітрыя Кананчука.
Парадавалі сёлета хлебаробы і высокай ураджайнасцю збожжа. На круг яго выйшла па 40,7 цэнтнера, што на дзевяць цэнтнераў больш, чым было летась. Гэты паказчык таксама самы лепшы ў раёне.
Зараз у гаспадарцы асноўныя сілы накіраваны на дасушку і падпрацоўку хлеба, на вызваленне ржышча ад саломы і падрыхтоўку да сяўбы азімых культур, плошча пад якія адведзена ў 685 гектараў. На гэтых работах заняты трактары МТЗ-1221 і МТЗ-1522 новых мадыфікацый з адпаведным прычапным інвентаром. У хуткім часе падрыхтоўкай да сяўбы зоймецца і большасць камбайнераў. А пакуль яны па-ранейшаму за штурваламі. З калгаснага поля пераехалі на ўборку збожжавых на прысядзібныя ўчасткі вяскоўцаў. А механізатары Уладзімір Лазянік і Валерый Дубянчук на
КЗР-10 дапамагаюць завяршыць жніво суседняму КСУП “Прудкоўскае”.
Я размаўляў з вяскоўцамі. Людзі вельмі задаволены, што і іх участкі ўбіраюцца хутка і якасна. Вось што, напрыклад, сказала пенсіянерка Юлія Адамаўна Коўгар (на здымку):
— Мне ў маладзейшыя гады трэба было два дні, каб зжаць сярпом такі ўчастак. А зараз і таго больш часу спатрэбілася б. Камбайн убраў маё поле за мінуты. А да ўсяго калгасныя вадзіцелі і дадому маю пшанічку адвезлі. Вялікае дзякуй нашаму старшыні за клопаты аб ветэранах.
Падзяку кіраўніцтву кааператыва выказвалі і іншыя вяскоўцы.
На апошніх гектарах вядуць жніво і некаторыя іншыя гаспадаркі раёна. Па яго заканчэнні яны таксама дапамогуць убраць збожжавыя на прыся-дзібных участках людзей.
Блізіцца да заканчэння ўборка збожжавых і зернебабовых культур і ў цэлым па раёне. Убрана ўжо больш чым 80 працэнтаў плошчаў.
Сцяпан БАЛОТКIН