Льнокамбайны на дуэлі

На нядаўняй рэспубліканскай нарадзе па пытаннях сельскай гаспадаркі Прэзідэнт Рэспублікі Беларусь Аляксандр Лукашэнка паставіў перад калектывам “Гомсельмаша” задачу — паскорыць выпрабаванне на палях рэспублікі новых ільнокамбайнаў і затым прыступіць да іх серыйнага выпуску.
Ужо на трэці дзень пасля нарады адзін з такіх камбайнаў быў за-дзейнічаны ў рабоце на льняным полі сельскагаспадарчага вытворчага кааператыва “Калгас імя Кірава” Гомельскага раёна. І не выпадкова. Вытворчасць і рэалізацыя льнопрадукцыі ў мінулым годзе былі тут найлепшымі ў вобласці. Летась з кожнага гектара атрымалі па пяць цэнтнераў іьносемя, а сёлета маюць намер давесці сярэднюю ўраджайнасць на 200-гектарнай плошчы да сямі цэнтнераў. Больш леташняга плануецца атрымаць і льновалакна. Віды на ўраджай добрыя. І першыя намалоты таксама. Спачатку работу пачалі трыма сваімі льнокамбайнамі КЛ-4 расійскай вытворчасці, якія выкарыстоўваюцца ўжо на працягу некалькіх гадоў. Па дамоўленасці з кіраўніцтвам раёна і гаспадаркі менавіта тут сельмашаўцы рашылі апрабаваць свой новы льнокамбайн. Крыху раней адзін з іх пачаў выпрабаванне ў Карэліцкім раёне. Адначасова апрабоўваецца і льнокамбайн бельгійскай вытворчасці.
Прайшло нямнога часу. Але пэўныя вывады зрабіць ужо можна. Кіраўнікі і спецыялісты “Гомсельмаша” і рэспубліканскага канструктарска-унітарнага прадпрыемства “ГСКБ па зернеўборачнай і кормаўборачнай тэхніцы”, з якімі я сустрэўся прама ў полі ў час выпрабаванняў ільнокамбайна, запэўнівалі, што гэта тэхніка класная і мае добрую перспектыву. З гэтай думкай пагаджаецца і вадзіцель-выпрабавальнік М. Б. Шынкевіч. Дарэчы, сам Міхаіл Барысавіч ужо некалькі гадоў асвойвае новую тэхніку “Гомсельмаша” на палях рэспублікі і за яе межамі. Летась на камбайне КЗС-7 у Мінскай вобласці намалаціў 1827 тон збожжа і заняў першае месца ў рэспубліцы. Сам Прэзідэнт краіны ўзнагародзіў М. Б. Шынкевіча легкавым аўтамабілем.
— Я лічу, што гэта машына выдатная, — сказаў мне Міхаіл Барысавіч. — Прадукцыйнасць яе прыкладна такая ж, як і ў бельгійскай, якая зараз працуе побач. Але тэх-нічныя параметры ў нашага камбайна лепшыя. Ён менш забіваецца ў час работы. Больш прыстасаваны да нашых умоў.
Словы вадзіцеля-выпрабаваль-ніка пацвярджае і старшыня кааператыва М. А. Гамідаў.
— Сельмашаўскі камбайн не пакідае пасля сябе нават адзінага сцябла на полі, — робіць вывады Магамет Амаравіч. — Якасць уборкі бельгійскага камбайна некалькі горшая. Што датычыць расійскіх камбайнаў, то яны ўжо даўно маральна ўстарэлі. Малапрадукцыйныя і дапускаюць страты ў час уборкі. Да таго ж, яны прычапныя. Для работы з імі трэба выдзяляць яшчэ і трактары. А гэта для любой гаспадаркі накладна. Я поўнасцю аддаю перавагу айчыннаму льнокамбайну і гатовы хоць сёння набыць яго. Так лічаць і нашы спецыялісты.
Да слоў М. А. Гамідава начальнік комплексу доследна-палявых вы-прабаванняў рэспубліканскага канструктарска-унітарнага прадпрыемства “ГСКБ па зернеўборачнай і кормаўборачнай тэхніцы” М. І. Карпенка і яго намеснік В. Г. Шак дадаюць, што сельмашаўскі камбайн амаль у два разы дзешавейшы за бельгійскі. Ды яшчэ і плаціць за яго не трэба валютай.
Вобразна кажучы, новы, асвоены ўпершыню на “Гомсельмашы”, льнокамбайн па ўсіх пазіцыях выходзіць пераможцай у саперніцтве з замежнымі. Значыць, у недалёкай перспектыве на льняных палях вобласці і рэспублікі, а магчыма і ў суседніх рэспубліках будуць дамініраваць камбайны з маркай “Гомсельмаша”.
НА ЗДЫМКУ: старшыня кааператыва М. А. Гамідаў, намеснік начальніка комплексу доследна-палявых выпрабаванняў рэспубліканскага канструктарска-унітарнага прадпрыемства “ГСКБ па зернеўборачнай і кормаўборачнай тэхніцы” В. Г. Шак, вадзіцель-выпрабавальнік
М. Б. Шынкевіч і начальнік комплексу М. І. Карпенка дзеляцца ўражаннямі аб рабоце айчыннага льнокамбайна.
Сцяпан БАЛОТКІН