На Херсон дарога адкрыта

З дзелавым візітам у Гомелі пабывала дэлегацыя Херсонскай гандлёва-прамысловай палаты Украіны на чале з яе прэзідэнтам В. У. Астраумавай.
З прадстаўнікамі абласнога і гарадскога ўпраўленняў адукацыі і кіраўнікамі гомельскіх турыстычных фірм абмеркаваны пытанні аб аздараўленні нашых дзяцей у Херсонскай вобласці, сумеснай рабоце па арганізацыі дзіцячага і маладзёжнага турызму.
У Гомельскім аддзяленні Беларускай гандлёва-прамысловай палаты адбылася кантактна-кааперацыйная біржа з удзелам украінцаў. Госці прадставілі канкрэтныя праекты супрацоўніцтва з Херсонскай вобласцю, а таксама Херсонскай асацыяцыяй аздараўленчых устаноў. Было вырашана прымаць дзяцей на аздараўленне ўжо сёлета з пачатку сезона і развіваць супрацоўніцтва па іншых напрамках.
 — У бліжэйшы час будзем весці перамовы па важных пытаннях, у тым ліку і аздараўленню дзяцей, з іншымі палатамі паўднёвых рэгіёнаў Украіны і Расіі, — зазначыў намеснік старшыні Беларускай ГПП — генеральны дырэктар Гомельскага аддзялення В. К. Старавойтаў. — Увогуле ў апошні час мы актывізавалі работу па стварэнню найлепшых умоў па супрацоўніцтву з замежнымі партнёрамі, у тым ліку і прадпрымальніцкімі структурамі.
 С. ДАРОЖНЫ