Сонца, азарт і валейбол

Адбыўся восьмы этап кубка Гомеля па пляжнаму валейболу. Гэты турнір арганізаваны гарадской федэрацыяй валейбола і праходзіць пад дэвізам “Спорт — супраць СНІДу”.
У чарговым туры прынялі ўдзел сем мужчынскіх і пяць жаночых каманд. На абедзвюх спартыўных пляцоўках разгарнулася надзвычай упартая і цікавая барацьба, а таму шкада, што гледачоў знайшлося нямнога. І дарэмна, бо сонца, пяску і азарту было дастаткова, а што яшчэ трэба летам? Магчыма, справа тут у адсутнасці інфраструктуры вакол пляцовак: няма трыбун, кіёскаў з марожаным і прахаладжальнымі напоямі, дарожак.
— Вельмі хацелася б прыцягнуць увагу людзей да пляжнага валейбола, — расказаў галоўны суддзя спаборніцтваў, старшыня гарадской федэрацыі валейбола
А. Г. Карпенка. — Перадумовы для гэтага ёсць: у нас у Гомелі ўжо прайшло больш тураў па гэтаму віду спорту, чым у рэспубліцы! Хіба гэта не паказчык? Пляцоўка наша восем на восем, мяч крышку падспушчаны, у камандзе два чалавекі, што робіць гульню больш відовішчнай, чым у звычайным валейболе!
У жанчын тур праходзіў пад пільным наглядам майстра спорту СССР, галоўнага трэнера каманды “Гомельдрэў-Надзея” Л. В. Вартанян. Абсалютна лепшай пасля чатырох запар перамог стала пара Таццяна Мураўёва і Таццяна Пазнякова.
Апошні тур кубка Гомеля па пляжнаму валейболу адбудзецца 7 жніўня.