Нацыянальны парк “Прыпяцкі” стаў турыстычнай кампаніяй года

Па словах генеральнага дырэктара Нацпарку “Прыпяцкі” Юрыя Апановіча, турыстычныя паслугі распрацоўваюцца з улікам часу і пажаданняў гасцей.

– Мы імкнёмся прадбачыць настрой турыстаў, што ім будзе цікава, эксперыментуем з ідэямі. Магчыма, таму паток людзей з розных куткоў краіны расце. Тыя, хто ўжо пабываў, пакідаюць добрыя водгукі, і ўжо наступным разам прывозяць з сабой сяброў. Пагадзіцеся, што ў нас ёсць усе ўмовы і магчымасці, каб стаць у Гомельскай вобласці “сваёй” Белавежскай пушчай, – падкрэсліў Юрый Апановіч.

У Нацпарку распрацавалі праграмы, разлічаныя на розныя ўзроставыя катэгорыі. Кожны знойдзе занятак па душы, расказала начальнік аддзела турызму і экалагічнай асветы Нацпарку “Прыпяцкі” Анастасія Анішчонак.

Самай папулярнай экскурсіяй застаецца шпацыр па “Сафары-парку”, дзе жывёлы знаходзяцца ў натуральным асяроддзі пасялення. Алені, лані, казулі, дзікі вольна гуляюць па спецыяльна адведзеных участках лесу, а наведвальнікі назіраюць за імі.

Распрацавана навагодняя праграма “У гасцях у Палескага Зюзі ў навагоднім Сафары-парку”, якая будзе працаваць па 28 студзеня 2023-га. Сёлета з’явіліся новыя турыстычныя маршруты, у тым ліку экалагічныя, арніталагічныя і водныя туры.

Візітнай карткай можна назваць чэмпіянат фота-сафары “Дзікае Палессе”, на які запрашалі ўсіх, хто любіць фатаграфаваць прыроду. Неверагодныя фотаздымкі размясцілі на сайце “Прыпяцкага”.