З крыніц спрадвечных

39-я міжнародная канферэнцыя “Сусветная фальклорная спадчына: мінулае, сучаснае і перспектыўныя накірункі даследаванняў”, якая прайшла ў Мінску ў Нацыянальнай акадэміі навук Рэспублікі Беларусь, сабрала прадстаўнікоў вядучых навуковых школ Еўропы, Паўночнай Амерыкі, Азіі і Аўстраліі. Удзельнікаў шчыра вітаў старшыня прэзідыума НАН Рэспублікі Беларусь Міхаіл Мясніковіч. У дакладах і выступленнях на форуме вучоныя падкрэслівалі, што і на сучасным этапе развіцця грамадства фальклор мае неацэннае значэнне як крыніца народнай мудрасці, духоўнасці. Прыкметна, што шматлікія даклады суправаджаліся выкананнем песень, абрадавых дзей, відэасюжэтамі.
Гомельшчыну ў складзе беларускай дэлегацыі прадстаўлялі выкладчыкі ГДУ імя Ф. Скарыны — загадчык кафедры беларускай культуры і фалькларыстыкі прафесар, доктар філалагічных навук Валянціна Новак і асістэнт кафедры тэорыі і практыкі англійскай мовы Кацярына Паборцава, якая, дарэчы, удзельнічала ў рабоце канферэнцыі як перакладчык. Гамяльчанкі выступілі з дакладам, прысвечаным фенаменальнай з’яве еўрапейскага фальклору — абраду “Пахаванне стралы”, і паказалі відэафільм, зняты ў вёсцы Казацкія Балсуны на Веткаўшчыне.
Матэрыялы міжнароднай канферэнцыі надрукаваны ў зборніку, які выдадзены Інстытутам мастацтва, этнаграфіі і фальклору НАН Рэспублікі Беларусь.
Тамара КРУЧЭНКА