Паклон зямлі пакалюбіцкай

Калі сямікласнік гімназіі № 71 г. Гомеля Іван Назараў зачытаў урывак са сваёй работы “Крыніца жыцця”, прысвечанай жыццю і творчасці Івана Сяркова, актавая зала Пакалюбіцкай сярэдняй школы Гомельскага раёна выбухнула апладысментамі. Здорава, што хлопчык зацікавіўся лёсам земляка, неаднаразова прыязджаў у вёску, каб напісаць сваю работу, якая заняла першае месца на Мележаўскіх чытаннях у Савецкім раёне Гомеля. Менавіта для такіх дзяцей і пісаў свае аповесці “Мы з Санькам у тыле ворага”, “Мы — хлопцы жывучыя”, “Мы з Санькам у артылерыі” Іван Сяркоў.
80-годдзю дзіцячага пісьменніка была прысвечана літаратурная вечарына, падрыхтаваная калектывам школы, Гомельскай раённай цэнтралізаванай бібліятэчнай сістэмай, літаб’яднаннем “Пралеска”. У ёй прымалі ўдзел удава пісьменніка Любоў Андрэеўна, сыны Андрэй і Іван, члены абласнога аддзялення грамадскага аб’яднання “Саюз пісьменнікаў Беларусі”. Яго старшыня Уладзімір Гаўрыловіч падкрэсліў: “Сёлетні год для літаратараў Гомельшчыны будзе пазначаны імем Івана Кірэевіча Сяркова. Лепшыя творы на дзіцячую тэматыку зоймуць старонкі альманаха “Гомельшчына літаратурная”.
— У яго была дабрэнная душа. Яна ад зямлі пакалюбіцкай, — сказаў пра свайго былога кіраўніка, галоўнага рэдактара Гомельскай студыі тэлебачання І. К. Сяркова паэт Міхась Болсун.  А відэафільм Гомельскай студыі тэлебачання, зроблены ў 1990-м, падараваў некалькі незабыўных хвілін гутаркі з пісьменнікам, які шчыра непакоіўся і за экалогію возера Сецін, і за стан чалавечай душы.
У вянок памяці Івану Сяркову гучалі песні пра яго любімую вёску ў выкананні ансамбля “Вясёлка” мясцовага Дома культуры і іншых вакалістаў, мелодыі школьнага духавога аркестра пад кіраўніцтвам Міколы Крыжэўскага. Старшыня Пакалюбіцкага сельсавета Уладзімір Чэркас і ўсе ўдзельнікі вечарыны рупіліся пра ўвекавечанне памяці Івана Кірэевіча Сяркова адпаведнай дошкай на доме ў Пакалюбічах, адкуль пачынаўся яго шлях у літаратуру.
Тамара КРУЧЭНКА