Песенны вянок велічынёй у два дзесяцігоддзі

Народны калектыў песні, музыкі і танца “Спадчына” Кармянскага раённага Дома культуры праз некалькі месяцаў будзе адзначаць сваё 20-годдзе. Узрост, па сутнасці, зусім малады, як, дарэчы, і ўдзельнікаў творчага калектыву. Любоў да песеннай і музычнай спадчыны Кармяншчыны, вялікае жаданне данесці яе да сённяшніх слухачоў аб’яднала розных людзей — педагогаў, вучняў старэйшых класаў школ райцэнтра, супрацоўнікаў арганізацый і ўстаноў Кармы. Ужо праз тры гады пасля стварэння “Спадчыне” было прысвоена званне народнага калектыву. Не злічыць і гастрольных паездак кармянскіх самадзейных артыстаў — яны былі ўдзельнікамі праграмы Генадзя Завалокіна “Іграй, гармонік”, выступалі ў Бранску на фестывалі “На зямлі Баяна”, у Бабруйску, Чачэрску і шмат якіх яшчэ гарадах Беларусі. На наступны год артысты атрымалі запрашэнне ўдзельнічаць у міжнародным фестывалі ў горадзе Дуброўна Віцебскай вобласці. Мастацкі кіраўнік “Спадчыны” Людміла Саломіна, канцэртмайстар Ігар Затрымайлаў і хормайстар Святлана Барысенка ўпэўнены — усе 27 удзельнікаў народнага калектыву прыкладуць шмат намаганняў, каб і на гэтым прэстыжным песенна-музычным форуме прадэманстраваць, на што здольныя кармянцы!
Мікалай Бяльковіч