Сцежкамі жыцця народных песняроў

Абласная універсальная бібліятэка імя У. І. Леніна і рэдакцыя “Гомельскай праўды”, абвясціўшы літаратурную віктарыну “Гомельскімі сцежкамі народных песняроў”, прысвечаную 125-гадовым юбілеям Янкі Купалы і Якуба Коласа, разлічвалі, што асноўнымі ўдзельнікамі яе будуць сталыя краязнаўцы. Тым больш прыемна, што ў віктарыне прынялі ўдзел і прадстаўнікі маладога пакалення.
Днямі ў “ленінцы” былі абвешчаны пераможцы віктарыны. Першае месца занялі вучаніцы 8 “А” класа сярэдняй агульнаадукацыйнай школы № 37 г. Гомеля Юлія Буднік і Кацярына Вераб’ёва (на здымку — момант узнагароджання іх намеснікам дырэктара “ленінкі” Юрыем Максіменка). Дзяўчынкі вельмі творча падыйшлі да справы: не толькі правільна адказалі на пытанні, але і аформілі сваю інфармацыю прыгожа. Другое месца ў Сяргея Грамыкі — інспектара ВАА “Балтрыбапрадукт”(г. Светлагорск), які ў сваім лісце падзяліўся шчырымі асабістымі меркаваннямі і даў разгорнутыя адказы. Настаўніца з гомельскай школы № 3 Юлія Аляксандраўна Прыходзька заняла трэцяе месца.
Цудоўным падарункам пераможцам алімпіяды стала літаратурна-музычная кампазіцыя “Пяро і бліскавіца” у выкананні бібліятэатра “Гракі”, што амаль 9 гадоў існуе пры бібліятэцы. Гледачы ўбачылі адну з цікавых старонак жыцця абодвух класікаў, гісторыю іх сяброўства, сцэны з п’ес “Тутэйшыя” і “Паўлінка” Я. Купалы.
Бессмяротныя творы выдатных песняроў гучаць і сення на поўную моц, дапамагаюць мысліць, узбагачаюць вопытам, хвалююць сваёй глыбінёй і мастацкай дасканаласцю.
Марына РАФЕЕВА