У Шклове — аб родным слове

Сёлетняе свята адзначаецца ў Шклове, на Магілёўшчыне.
Сімвалічна, што адбываецца яно напярэдадні святкавання 125-гадавіны з дня нараджэння Якуба Коласа, які сваёй творчасцю, сваёй неўміручай “Новай зямлёй” будзе нагадваць і нашым на¬шчадкам пра адметнасць зямлі бацькоўскай, нашай мовы і гісторыі: “Мой родны кут, як ты мне мілы!”
Будзем шчырымі: мы ўсё яшчэ не спазналі, якая літаратура створана на мове Купалы і Коласа, Дубоўкі і Мележа, Шамякіна і Макаёнка, Брыля і Караткевіча... Мы не спасціглі яшчэ і часткі сваёй духоўнай спадчыны.
Дзяржава ў апошнія гады дбайна рупіцца пра выданне кніг на роднай мове, сапраўды залатых фаліянтаў, якія займаюць дастойнае месца на прэстыжных выставах, конкурсах. Аднак у бібліятэках цікавасць да свайго, наскага праяўляюць найбольш тыя, хто па роду сваёй дзейнасці звязаны са Словам.
А заўтра яно загучыць ва ўсю моц на плошчах і вуліцах, у скверах і парках старажытнага Шклова. У праграме Дня беларускага пісьменства — цырымонія ўзнагароджання пераможцаў Рэспубліканскага конкурсу на лепшы мастацкі твор 2006 года “Залаты Купідон” і Нацыянальнага конкурсу “Мастацтва кнігі” — “Залаты фаліянт”, канцэрт з удзелам зорак беларускай эстрады.
На святкаванне ў Шклоў едуць і гамяльчане — члены грамадскага аб’яднання “Саюз пісьменнікаў Беларусі” Уладзімір Гаўрыловіч, Ніна Шклярава, Васіль Ткачоў, Алена Кобзева, Міхась Болсун, Алег Ананьеў, Аляксандр Атрушкевіч, Генадзь Говар.
Тамара КРУЧЭНКА