Паэтычны дэсант ва універсітэт

Паэзія акрыляе сваёй прасветленай прыгажосцю мары. Чаго так не стае нам у будзённай мітусні, пагоні за наладжваннем быту. Ці не таму з такой радасцю спатолілі гэтую смагу прыхільнікі прыгожага пісьменства — студэнты і выкладчыкі філалагічнага факультэта ГДУ імя Ф. Скарыны. У Міжнародны дзень паэзіі на сустрэчу да іх завіталі 15 паэтаў-гамяльчан — членаў абласной арганізацыі грамадскага аб’яднання “Саюз пісьменнікаў Беларусі”. Сустрэчу адкрыў загадчык кафедры беларускай літаратуры, прафесар, доктар філалагічных навук Іван Штэйнер.
2007 год асвечаны 125-гадовымі юбілеямі айчынных класікаў — Янкі Купалы і Якуба Коласа. Старшыня абласнога аддзялення грамадскага аб’яднання “Саюз пісьменнікаў Беларусі” Уладзімір Гаўрыловіч, нагадаўшы пра гэта, расказаў пра творчыя конкурсы, у якіх зараз удзельнічаюць літаратары Палесся. Потым гучалі вершы і апладысменты. У сустрэчы бралі ўдзел паэты Іван Бісеў, Ніна Шклярава, Алена Агіна, Лілія Вялічка, Аляксандр Врубель, Мікола Ждановіч, Алена Кобзева, Святаслаў Крупенька, Аляксандр Атрушкевіч, Яўген Калашнікаў і іншыя.
Тамара КРУЧЭНКА