Тыдзень Маці на зямлі Беларусі

У нашай вобласці з 10 па 15 кастрычніка праводзіцца мноства мерапрыемстваў, вечарын, прымеркаваных да гэтага светлага, узвышанага пяшчотай і любоўю свята — Дня маці. У школах, тэхнікумах, вучылішчах, вышэйшых навучальных установах адбудуцца ранішнікі, канцэрты, конкурсы сачыненняў і дзіцячых малюнкаў, распачнуць работу творчыя майстэрні. І сапраўды, усё самае лепшае рыхтуем для мам.
А ў працоўных калектывах пройдуць сустрэчы з матулямі, якія выхавалі дастойных і знакамітых сыноў і дачок, людзей, што ўславілі нашу Беларусь. Запланаваны і кансультацыі педагогаў, юрыстаў, псіхолагаў. Пройдзе медыцынская асветніцкая акцыя “Моладзь Гомельшчыны — супраць залежнасцей”.
Асаблівым клопатам у гэтыя дні будуць атулены ўдзельніцы Вялікай Айчыннай, маці і жонкі загінуўшых у лакальных канфліктах, пры выкананні інтэрнацыянальнага абавязку.
І ў аддаленых вёсачках маці адчуюць па-сапраўднаму сваё свята. Уславіць працаўніц сельскай нівы, перадавікоў вытворчасці, ветэранаў працы, нашых шаноўных “бабуль — усім матулям матуль”, прыедуць работнікі райвыканкамаў. Адбудуцца фестывалі сямейнай творчасці, вечары-партрэты, агляды-конкурсы.
Вітаць напярэдадні свята будуць і маладых мам, студэнцкія сем’і. А дзень 14 кастрычніка пачнецца набажэнствам у гонар свята Прасвятой Багародзіцы “За здравіе ўсіх маці Беларусі” ў саборы Пятра і Паўла. А ў абласным драматычным тэатры адбудзецца прыём старшынёй аблвыканкама А. С. Якабсонам дэлегацый маці з раёнаў і гарадоў Гомельшчыны. Парадуе іх вялікі святочны канцэрт з удзелам прафесійных і самадзейных артыстаў.
Тамара ВІКТАРАВА