Беларуская Масленіца ў Нью-Дэлі

Гамяльчанка Алена Ганюк заваявала залаты медаль на міжнародным Шанкарскім конкурсе дзіцячага малюнка. Штогод у Індыі праводзіцца фестываль творчасці для таленавітых юнакоў і дзяўчат, штогод дасылаецца на конкурс больш за тысячу работ маладых мастакоў. У гэтым годзе лепшай стала наша зямлячка, навучэнка Гомельскага дзяржаўнага мастацкага вучылішча Алена Ганюк. Яна, акрамя вучылішча, займаецца яшчэ і ў народнай выяўленчай студыі абласнога Палаца творчасці дзяцей і моладзі ў заслужанага настаўніка Беларусі мастака Валянціна Пакаташкіна. Алена з’яўляецца пераможцай шматлікіх конкурсаў і фестываляў як абласнога, рэспубліканскага, так і міжнароднага ўзроўняў. З Нью-Дэлі прыйшоў ліст з паведамленнем пра яе перамогу і запрашэннем на цырымонію ўзнагароджвання. Малюнак Алены з выявай прыгожай беларусачкі ў нацыянальным адзенні, якая ў руках трымае духмяныя бліны, атрымаў прызнанне замежнага журы. Напэўна, беларуская Масленіца нагадала індыйцам іх нацыянальнае свята Холі. Абодва яны вясновыя, напоўненыя абуджэннем прыроды, сонечным светам і вясёлым настроем. У Індыі, як і на Беларусі, спальваюць чучала — сімвал зімы, моладзь водзіць хараводы, спявае песні. “Мне перш за ўсё хацелася расказаць пра сваю Радзіму, яе традыцыі і святы”, — зазначыла дзяўчына. І гэта ў яе атрымалася!