8 лютага 1921 года ў вёсцы Глінішчы Хойніцкага раёна нарадзіўся Іван Мележ

8 лютага 1921 года ў вёсцы Глінішчы Хойніцкага раёна нарадзіўся будучы класік айчыннай літаратуры Іван Мележ.

Раннія творы пісьменніка вельмі высока ацаніў Кузьма Чорны. У 1950 годзе наш зямляк напісаў раман “Мінскі напрамак”. У ім Іван Паўлавіч адным з першых у пасляваеннай літаратуры ўвасобіў вобраз камандуючага Івана Чарняхоўскага.

Шукаў сябе творца і ў драматургіі, стварыў п’есу пра інтэлігенцыю “Пакуль вы маладыя” і драму “Дні нараджэння”. Аднак галоўным вынікам творчасці народнага пісьменніка Беларусі Івана Мележа стала трылогія “Палеская хроніка”, за якую ён быў адзначаны ў 1972 годзе Ленінскай прэміяй. Раманы мележаўскай хронікі па сваёй карэннасці, прывязцы да бацькоўскага краю можна параўнаць з паэтычнай “Новай зямлёю” Якуба Коласа. Праз вобразы Васіля і Ганны, Міканора, Апейкі, Яўхіма мы пазнавалі Палессе. Сам пісьменнік пісаў: “Людзі на балоце” я назваў бы лірычным раманам. Працягваў у “Подыху навальніцы” хроніку як раман-даследаванне. Заканчваў “Палескую хроніку” раманам “Завеі, снежань” як творам драматычным, трагедыйным.”

Сваю любоў да Палесся, да сваіх каранёўцаў-глінішчанцаў пісьменнік пранёс праз усё жыццё. У дзень нараджэння класіка ў музей у аграгарадку Глінішчы прыдуць на экскурсію школьнікі мясцовай школы, якая носіць імя славутага земляка.