Мары аб метале, або Падарыце Калінкавічам скульптуру

Колькі прыгожых месц у Калінкавічах! Але сярод шматпавярховак іх часам не заўважаеш. Дык чаму ж не парадаваць жыхароў і гасцей горада малымі архітэктурнымі формамі ці скульптурамі? Каб не толькі побач з Каласком і Калінкай ды мужыком з кароваю можна было сфатаграфавацца. І добрая прычына ёсць — 450-годдзе горада Калінкавічы.
Вось калі б… На пляцоўцы ля дома гандлю “Бярозка” стаіць дзяўчына з пакупкамі, запрашае ў краму. У парку дзеці кормяць галубоў. На лаўцы каля Фонду сацыяльнай аховы насельніцтва сядзіць дзядуля, які расказвае цікавую гісторыю з жыцця. (Яны ж хоць і з металу, але кожны падштурхне цябе да глабальных думак.) Павесялееш каля кінатэатра з рэжысёрскім стулам і камерай. Прыезджы з чамаданам чакае таксі ля чыгуначнага вакзала, глядзіць на гадзіннік…
Ці не павесялеў бы горад з такімі новымі жыхарамі вуліц? Можна ўпрыгожыць не толькі да 450-годдзя, але і да… кожнага дня.