“Русалку” носяць на насілках

У беларуска-расійска-украінскім памежжы ёсць шмат абрадаў, якія яднаюць нашы славянскія народы. Напрыклад, абрад пахавання стралы бытуе ў Злынкаўскім, Навазыбкаўскім раёнах Браншчыны. Ідэю працягу роду нясе ў сабе абрад “Калодкі”, які ёсць і ў нас, і ў суседзяў-расіян. Але калі ў нас на Гомельшчыне да нагі маладога чалавека чапляюць сапраўдныя абрубкі палена, то ў Злынкаўскім і Навазыбкаўскім раёнах Браншчыны “калодкі” замяшчаюць вышыванымі хусцінкамі, якія нявесты прымацоўваюць на пінжакі сваім жаніхам. А вось характэрны для нашага памежжа абрад “Ваджэнне русалкі” у вёсцы Азарычы Злынкаўскага раёна мае сваю адметнасць: тут маладую жанчыну носяць на насілках чацвёра мужчын. Яна ж сядзіць, звесіўшы ногі…

Гэтыя і іншыя цікавыя звесткі народнага побыту беларусаў, украінцаў, расіян гучалі на міжнароднай навукова-практычнай канферэнцыі “Расійска-беларуска-украінскае памежжа: праблемы фарміравання адзінай сацыякультурнай прасторы — гісторыя і перспектывы”, якая прайшла на базе Бранскага дзяржаўнага універсітэта імя акадэміка
І. Г. Пятроўскага. Работа вялася па секцыях. На іх былі прадстаўлены цікавыя даклады дырэктара Веткаўскага музея народнай творчасці Галіны Нячаевай “Іранскі кампанент у севяран і асаблівасці этнаграфічных тканін міжрэчча Сожа — Іпуці”, а таксама сумесныя напрацоўкі доктара тэхнічных навук ГДУ імя Ф. Скарыны Дзмітрыя Ліна і выкладчыка Уральскага дзяржаўнага педуніверсітэта Алега Гарбачова па тэме “Дэмаграфічнае развіццё беларуска-расійскага памежжа ва ўмовах урбанізацыі”, прафесара ГДУ імя Ф. Скарыны Валянціны Новак “Асаблівасці міфалагічнага светапогляду жыхароў гомельска-бранска-чарнігаўскага памежжа” і дырэктара філіяла Бранскага дзяржаўнага універсітэта імя акадэміка І. Г. Пятроўскага ў Навазыбкаве Святланы Старадубец “Народныя звычаі і абрады расійска-беларускага памежжа”.
Удзельнікаў канферэнцыі шчыра вітаў старшыня камітэта па навуцы адміністрацыі Бранскай вобласці Юрый Лунёў.
Т. ВІКТАРАВА