Больш сонца і радасці!

Учора нашаму калегу Анатолю Рыдкіну, які 37 гадоў свайго жыцця займаецца навінамі, споўнілася 60. Сваю журналісцкую кар’еру ён пачынаў карэспандэнтам абласнога радыё, 17 гадоў быў старшым рэдактарам. Затым у якасці ўласнага карэспандэнта рэспубліканскага радыё працаваў на Віцебшчыне.
Гледзячы на круглую лічбу юбіляра, найперш думаеш пра хуткі бег часу. Анатоль, які спяшаўся абагнаць яго, ужо на гэтым жыццёвым адрэзку мудра і разважліва падыходзіць да пенсійнай рысы.
Анатоль Рыдкін адпрацаваў у “Гомельскай праўдзе” дастойна, імкнучыся кожнай сваёй публікацыяй высветліць праблему, сцвердзіць справядлівасць, дапамагчы людзям. Часцей за ўсе ён бываў у камандзіроўках на Кармяншчыне і ведаў там ледзь не кожнага падпісчыка абласной газеты. І яго там пазнаюць, вітаюцца, дзеляцца злабадзённымі праблемамі, пішуць лісты.
Анатоль, мы не ўспрымаем твае 60 як узрост пенсіянера: ты шмат пісаў на спартыўную тэму, а таму і сам трымаеш форму, тлушчам не заплыў. Хай усё складваецца надалей так, як ты хочаш. Хай будзе больш сонца і радасці ў тваім жыцці!

Твая “ГП” — сябры і калегі