Поўніцца малочная рака

Па выніках работы ў жывёлагадоўлі за мінулы год да ліку лідэраў спаборніцтва Міністэрства сельскай гаспадаркі і харчавання рэспублікі аднесла і сельскагаспадарчы вытворчы кааператыў “Губічы” Буда-Кашалёўскага раёна.
У сярэднім ад каровы летась тут упершыню за гісторыю гаспадаркі атрымана амаль па шэсць з палавінай тысяч кілаграмаў малака, што значна больш, чым у папярэднім годзе.
Зараз статак знаходзіцца на пашавым утрыманні. У сярэднім ад каровы за суткі жывёлаводы надойваюць па 18 кілаграмаў малака — амаль на два з палавінай кілаграмы больш, чым за адпаведныя дні летась. Кааператыў па гэтым паказчыку ўпэўнена займае першае месца ў раёне.
— Такога поспеху дабіваемся дзякуючы прымяненню перадавых тэхналогій у жывёлагадоўлі, стараннасці людзей і добрай арганізацыі іх працы, — расказвае старшыня СВК М. А. Рыбік. — Вельмі важна і тое, што зімой і летам пагалоўе ўдосталь забяспечваем паўнацэннымі рацыёнамі.
Вось і зараз штодзённа на карову выдзяляецца не менш чым 60 кілаграмаў зялёных кармоў.
Адначасова трава скошваецца і для стварэння трывалай кармавой базы на зіму. З першых дзён касавіцы ў сельгаспрадпрыемстве асноўная стаўка робіцца на сена, запасы якога з кожным днём папаўняюцца.

С. ДАРОЖНЫ