Адны выходзяць з прарыву, іншыя застаюцца на месцы

На выязным абласным семінары-нарадзе ў Акцябрскім раёне па пытаннях выканання прагнозных паказчыкаў у аграрным сектары за студзень — красавік 2008 года прынялі ўдзел старшыня аблвыканкама А. С. Якабсон і яго першы намеснік А. В. Баранаў.

На нарадзе падкрэслівалася, што работнікі ферм вобласці за чатыры месяцы дабіліся пэўных поспехаў. Прагнозныя паказчыкі па валавой вытворчасці малака выкананы на 111,5%. Павысіўся сярэдні надой ад каровы. Прыемна, што выходзяць з прарыву раёны, якія раней пастаянна адставалі. Напрыклад, жлобінскія жывёлаводы павялічылі валавыя надоі малака ў параўнанні з адпаведным мінулагоднім перыядам на 21,2%, а рагачоўскія — на 16,5%. Паступова заваёўвае перадавыя пазіцыі ў галіне Добрушскі раён. Але, на жаль, так абстаяць справы не ўсюды. Не выканалі прагнозныя паказчыкі ў Лельчыцкім, Кармянскім і некаторых іншых раёнах. Трэба лепш наладзіць работу не толькі ў жывёлагадоўлі, а і ў іншых галінах аграрнікам Хойніцкага, Чачэрскага раёнаў. Ды і ў цэлым па вобласці спаўна не выкарыстоўваюцца рэзервы і магчымасці па нарошчванню аб’ёмаў сельскагаспадарчай прадукцыі. У асобных сельгаспрадпрыемствах застаюцца нізкімі прывагі маладняку буйной рагатай жывёлы на дарошчванні і адкорме. Ёсць праблемы ў свінагадоўлі і раслінаводстве, арганізацыі працы людзей на палях і фермах. У некаторых гаспадарках не ў поўнай меры выкарыстоўваюцца меры маральнага і матэрыяльнага заахвочвання перадавікоў, парушаюцца працоўная і тэхналагічная дысцыпліны.

На семінары-нарадзе адзначалася, што ў гэтыя дні трэба асноўную ўвагу надаць паляпшэнню арганізацыі пашавага перыяду ўтрымання жывёлы, яе начной пасьбы з тым разлікам, каб на танных зялёных кармах атрымаць больш малака і мяса.
У ходзе семінара-нарады яго ўдзельнікі наведалі фермерскую гаспадарку У. А. Чубенкі, сельскагаспадарчы вытворчы кааператыў “Маісееўка”.

Сцяпан БАЛОТКІН