Бульбачка наша спаконвечная

Колькі і жыве на свеце пенсіянерка Г. С. Шчарбакова, былая работніца Турскай сортавыпрабавальнай станцыі Рагачоўскага раёна, ні адзін дзень не абыходзілася без бульбы. І не толькі яна. Усе вяскоўцы любяць нашу  беларускую бульбачку. Таму з задавальненнем вырошчваюць яе на прысядзібных участках і ў гаспадарцы. Больш таго, у Турску разводзяць высокаўраджайныя насенныя клубні і рэалізуюць іх іншым сельгаспрадпрыемствам раёна, часткова і вобласці. У гадавальніку на адным гектары разводзіцца некалькі дзесяткаў сартоў, а лепшыя потым вырошчваюцца на полі, якое займае сто гектараў.
Летась найбольш ураджайным аказаўся сорт “Карэта”, які даў па 415 цэнтнераў клубняў на гектары. Таму сёлета пад яго плошча расшырана з дваццаці гектараў да трыццаці. Вырошчваецца таксама бульба “Скарб”, “Лугаўскі”, “Адзісей”, іншых сартоў.
 — Да пасадкі бульбы сёлета прыступілі вельмі рана ў параўнанні з папярэднімі гадамі, — зазначыў галоўны аграном станцыі А. А. Ясонаў. — На новай сучаснай бульбасаджалцы, якую мы набылі летась, перадавы механізатар Віктар Русін зараз за дзень садзіць клубні на пяці гектарах, а бывае і на большай плошчы. Вадзіцель  Уладзімір Нуждзін своечасова забяспечвае загрузку саджалкі насеннымі клубнямі. Праз дзень-два уключым у работу і яшчэ адзін пасадачны агрэгат.
 З апярэджаннем графіка рыхтуецца і глеба. Сёлета з разліку на гектар уносіцца звыш сарака тон арганікі. Хутка і якасна пры дапамозе новай фрэзы “Базылер” Уладзімір Савіцкі наразае барозны. Стараннасцю вызначаюцца і іншыя механізатары. Прадумана аплата працы людзей. За звышпланавую работу расцэнкі падвойваюцца. Прама ў полі хлебаробы забяспечваюцца гарачым харчаваннем, якое добра гатуецца ў Рагачоўскім кафэ “Брыганціна”.
 — Паколькі попыт на насенне нашай бульбы ў сельгаспрадпрыемствах расце, то ўжо сёлета ўраджайнасць і валавы збор клубняў вырашана павялічыць больш чым напалавіну, — гаворыць дырэктар сортавыпрабавальнай станцыі С. У. Якаўлеў. — Заадно хачу напомніць, што гаспадаркі, якія закупляюць у нас насенны матэрыял, як правіла, дабіваюцца высокіх ураджаяў бульбы.
Сцяпан БАЛОТКІН