На фінішы — першыя

Хлебаробы Гомельшчыны першымі ў рэспубліцы пасеялі яравыя раннія збожжавыя і зернебабовыя культуры. Усяго сёлета іх пасеяна 121815 гектараў.  
У цэлым план сяўбы яравых культур выкананы на 44%. Таму работы ў полі з кожным днём набіраюць большы размах. Вядуцца падрыхтоўка глебы, унясенне мінеральных і арганічных удабрэнняў пад бульбу, кукурузу, караняплоды, іншыя больш познія яравыя культуры. Напрыклад, на 16 красавіка падрыхтавана 65% глебы да плана. А ў Хойніцкім раёне яе гатоўнасць складае 75%. У Гомельскім, Добрушскім і Лоеўскім раёнах падрыхтавана 74% глебы. Не намнога адстаюць хлебаробы Рэчыцкага, Брагінскага, Мазырскага, Светлагорскага і Нараўлянскага раёнаў.
У некаторых гаспадарках вобласці прыступілі ўжо і да пасадкі не толькі ранніх, а і больш позніх сартоў бульбы. Найбольш высокімі тэмпамі гэта работа вядзецца ў Петрыкаўскім раёне, дзе з планавых 650 гектараў клубні пасаджаны ўжо на 228 гектарах. Больш чым на ста гектарах пасадзілі бульбу ў Жыткавіцкім, Светлагорскім і Хойніцкім раёнах. Сёлета пад гэту культуру ўносіцца больш арганічных і мінеральных удабрэнняў, чым летась.
Як паведамілі ў Міністэрстве сельскай гаспадаркі і харчавання рэспублікі, тэмпы пасяўных работ у цэлым у нашай вобласці больш высокія, чым у іншых рэгіёнах. Важны і такі факт, што гомельскія хлебаробы разам з брэсцкімі першымі ў рэспубліцы завяршылі падкормку мінеральнымі тукамі азімых збожжавых культур і рапсу.
Сцяпан БАЛОТКІН