Малако пацякло ракой

Любы вясковы чалавек скажа, што найбольш малака каровы даюць летам, калі ўтрымліваюцца на высокапажыўных зялёных кармах. У прынцыпе гэта так. Але ў Буда-Кашалёўскім раёне ёсць сельгаспрадпрыемствы, дзе і зімой сутачныя надоі ад каровы дасягаюць амаль пуда. У першую чаргу работнікі райсельгасхарчу прыводзяць у прыклад сельскагаспадарчы вытворчы кааператыў “Губічы”. Тут прыбаўка ў параўнанні з адпаведнымі леташнімі днямі складае чатыры кілаграмы на карову.
 — У нас я не ведаю гаспадаркі, дзе б і летам былі такія высокія надоі, як тут зімой, — зазначыла адна з аператараў машыннага даення кароў, якая ў канцы мінулага года пераехала ў Губічы з Акцябрскага раёна. — Тутэйшым жывёлаводам можна пазайздросціць. У іх заработная плата ў некалькі разоў вышэйшая, чым у маёй былой гаспадарцы. І працаваць лепш. Так што хутка ўся наша сям’я пераедзе сюды.
 — З кадрамі ў жывёлагадоўлі праблем  няма, — зазначае старшыня кааператыва М. А. Рыбік. — Па меры магчымасці расшыраем вытворчасць і ствараем на фермах новыя рабочыя месцы. І адразу ж на іх падбіраем старанных людзей, у тым ліку і з іншых гаспадарак, адкуль яны і просяцца да нас.
 Міхаіл Аляксеевіч падкрэслівае, што на малочнатаварныя фермы людзі ахвотна ідуць таму, што там створаны добрыя ўмовы для працы і нармальнага заработку. Найбольш вопытныя даяркі, улічваючы розныя прэміі і надбаўкі, атрымліваюць у месяц да мільёна рублёў.
Разам з М. А. Рыбікам мы пабывалі на цэнтральнай ферме. Усе жывёлагадоўчыя памяшканні за няпоўныя тры гады тут поўнасцю рэканструяваны, механізаваны ручныя працаёмкія працэсы, укаранёна сучаснае абсталяванне. Летась нават малакаправодныя трубы ўстанавілі з нержавеючага металу.
Выдатна абсталяваны пакой для адпачынку. Тут можна паглядзець у свабодны ад работы час тэлевізар, папіць гарбаты або кавы. Я звярнуў увагу на прыгожую мэблю, якой не знойдзеш у многіх вяскоўцаў і дома.  Ёсць на ферме дабротныя раздзявалкі, душ. 
Пастаянна ўдасканальваецца тэхналогія вытворчасці малака, паляпшаецца дойны статак. Яшчэ некалькі гадоў назад у кааператыве ўшчыльную заняліся племянной работай. Таму зараз усё пагалоў’е высока­прадуктыўнае. Ялавай жывёлы няма зусім. Летась на сто кароў атрымана 123 цяляці. Гэта лепшы паказчык у раёне.
Раслінаводчая галіна забяспечвае жывёлагадоўчую ў дастатковай колькасці высакаякаснымі кармамі. Як правіла, сянаж і значная частка сіласу закладваюцца з канюшыны — самай малакагоннай травяной культуры. Няма праблем з канцэнтраванымі кармамі, бялковымі і вітаміннымі дабаўкамі. І такая характэрная дэталь. Нягледзячы на трывалую кармавую базу,  кармы  расходваюцца ашчадна,  выдаюцца жывёле ў залежнасці ад яе прадуктыўнасці. У выніку і надоі высокія, і прадукцыя якасная. А за два апошнія гады надоі прыкметна выраслі. Ужо ў 2006 годзе ўпершыню за ўсю гісторыю гаспадаркі ад каровы атрымана 4906 кілаграмаў малака, а летась гэты паказчык даведзены да 5723 кілаграмаў. А Валянціна Сакаўчук і Лідзія Маталыгіна надаілі ад каровы па восем тысяч кілаграмаў малака. Гэтыя даяркі, а таксама Алена Заяц, якая атрымала за мінулы год па 6938 кілаграмаў малака ад каровы, прызнаны лепшымі па прафесіі і зараз да асноўнага заробку атрымліваюць па 30 працэнтаў даплаты.
Намеснік старшыні кааператыва па ідэалагічнай рабоце старшыня прафкама Людміла Кузьмянкова расказала, што  працаўнікі гаспадаркі па выніках пашавага і зімова-стойлавага ўтрымання жывёлы, калі выконваюць заданні, атрымліваюць вялікія прэміі. Таму і стараюцца. А дасягненні перадавікоў з’яўляюцца добрым арыенцірам для ўсіх работнікаў ферм.
Сцяпан БАЛОТКІН