Ехалі ў рэдакцыю, а апынуліся ў маладосці...

Такімі словамі трапна акрэсліў нядаўнюю сустрэчу ў рэдакцыі “Гомельскай праўды” адзін з ветэранаў журналістыкі.
Больш сталыя чытачы нашай газеты, вядома ж, памятаюць гэтыя імёны пад артыкуламі, замалёўкамі, фельетонамі: Станіслаў Савасцееў, Пётр Ельскі, Мікалай Старчанка, Алена Лагуновіч, Уладзімір Стэльмах, Вадзім Цішкевіч, Аліна Клыга, Іван Петрачэнка — кожны з іх шмат гадоў жыцця самааддана служыў яе вялікасці Журналістыцы. Не абыходзіўся ніводны выпуск газеты без тэхнічных работнікаў рэдакцыйнага калектыву — карэктараў, машыністак, вадзіцеляў і прадстаўнікоў іншых прафесій. Хаця ўсе яны і знаходзяцца пэўны час на заслужаным адпачынку, але сувязі з калектывам абласной газеты не губляюць — шчыра цікавяцца падзеямі, працоўнымі здабыткамі і творчымі поспехамі сённяшніх журналістаў. Каб сувязь гэта была яшчэ больш моцнай, у рэдакцыі ўсталявалася даўняя традыцыя — выпісваць ветэранам нашу газету. А яшчэ
ветэраны справядліва лічаць, што
90-гадовы юбілей, які ў хуткім часе адзначыць “Гомельская праўда”, гэта свята — кожнага з іх.
З гэтай нагоды і былі запрошаны былыя супрацоўнікі газеты на сустрэчу з сённяшнім калектывам. Галоўны рэдактар Сяргей Бяспалы шчыра павіншаваў ветэранаў з юбілеем старэйшага друкаванага выдання вобласці, пажадаў ім моцнага здароўя, доўгіх і шчаслівых гадоў жыцця. У час сустрэчы адбыўся зацікаўлены дыялог “маладой і сталай журналістыкі”. Ішла адкрытая, шчырая размова аб уздзеянні друкаванага слова на чытачоў, адказнасці журналіста за дакладнасць таго, што ён у сваёй карэспандэнцыі піша. Бо слова, як вядома, чалавека можа і натхніць, абагрэць, а можа і параніць...
Ветэранам рэдакцыі былі ўручаны грашовыя прэміі і сувеніры. А выказаных у іх адрас слоў падзякі за шматгадовую плённую працу ў калектыве, добрых пажаданняў на доўгія гады і прыязных усмешак было столькі, што і не падлічыць...
Мікалай БЯЛЬКОВІЧ