Дзе ж вы, рапсавыя мільёны?

Парадавала сёлета азімае поле хлебаробаў сельскагаспадарчага вытворчага кааператыва “Каменка” Кармянскага раёна. Тут атрымалі добры ўра-джай не толькі пшаніцы і жыта, а і рапсу. З гектара яго намалацілі па 16,4 цэнтнера, што значна больш, чым у сярэднім па раёну і вобласці. У гаспадарцы разлічвалі хутка рэалізаваць прадукцыю і за выручаныя грошы пакрыць бягучыя расходы, якіх зараз у вяскоўцаў многа. Але пакуль гэтыя разлікі толькі і застаюцца разлікамі. Чаму?
Рапс першых намалотаў прадалі ў Рагачоўскі раён і адразу атрымалі за яго грошы. Асноўную ж частку прадукцыі адгрузілі ў КСУП “Прыпяць” Мазырскага раёна. Там таксама з ахвотай забралі рапс і абяцалі хутка разлічыцца за яго. Аднак на 16 жніўня з 16 мільёнаў 700 тысяч рублёў пералічылі толькі пяць мільёнаў.
— У накладзе пакуль застаюцца не толькі хлебаробы з Каменкі, а і з іншых гаспадарак, якія прадалі сёлета зерне рапсу ў “Прыпяць”, — каменціруе сітуацыю начальнік упраўлення сельскай гаспадаркі і харчавання райвыканкама В. Д. Андрыянаў. — У цэлым па раёну паставілі яго больш чым на дзвесце мільёнаў рублёў, а пералічылі нам пакуль усяго 60 мільёнаў. А грошы зараз вельмі патрэбны, у тым ліку і на забеспячэнне ўраджаю рапсу ў наступным годзе. У раёне плошчы пад азімы рапс на 2008 год павялічаны да паўтары тысяч гектараў. І зараз ужо вядзецца сяўба яго. Трэба закупляць гаруча-змазачныя матэрыялы, тукі, насенне, аплачваць іншыя расходы. Пад улік браліся і грошы за вырашчаны і своечасова рэалізаваны рапс. А іх пакуль няма. Пашанцавала тым гаспадаркам Гомельшчыны, якія сваю прадукцыю прадалі ў Рагачоўскі раён і ў адкрытае акцыянернае таварыства “Віцебскі МЭЗ”. Там не толькі своечасова выплачваюць грошы за атрыманую прадукцыю. Віцябляне, напрыклад, нярэдка фінансуюць вяскоўцаў пад новы ўраджай.
— Мы і сёлета маглі завезці ўвесь рапс у Віцебск, яго там готовы былі прыняць. Самі нават прасілі прадукцыю, — сумна разважае В. Д. Андрыянаў. — Але вырашылі ў першую чаргу падтрымаць сваіх гомельскіх перапрацоўшчыкаў. А яны, мякка кажучы, падводзяць нас з аплатай. Напамінаем аб гэтым кіраўніцтву і работнікам бухгалтэрыі сельгаспрад-прыемства “Прыпяць”, а яны ў адказ спасылаюцца на розныя прычыны з затрымкамі пералічэння грошай і абяцаюць у бліжэйшы час разлічыцца...
Сцяпан БАЛОТКІН