Хлебны каравай набірае вагу

Сёлетняе жніво праходзіць у складаных кліматычных умовах. Значна больш, чым у папярэднія гады, падгарэлай і палеглай збажыны. Часта ідуць дажджы і зараз.
Тым не менш хлебаробы не апусцілі рукі, а супрацьпаставілі цяжкасцям арганізаванасць, стараннасць, уменне манеўраваць тэхнікай і людзьмі. Гэта спрыяе хуткім тэмпам уборачных работ пры мінімальных стратах. Некалькі раёнаў ужо абмалацілі больш 80 працэнтаў плошчаў збожжавых і зернебабовых культур. У іх ліку і гаспадары сёлетніх рэспубліканскіх “Дажынак” — рэчыцкія хлебаробы. На ўчарашні дзень тут быў самы высокі валавы намалот у вобласці — 76140 тон. Рэчычане працягваюць лідзіраваць і па ўраджайнасці збожжавых культур.
Прыкметна растуць намалоты збожжа ў Рагачоўскім, Буда-Кашалёўскім, Добрушскім і некаторых іншых раёнах.
Папаўняюцца і рады камбайнераў-тысячнікаў. Калі першыя з іх у пачатку жніва з’явіліся толькі ў Рэчыцкім раёне, то зараз тысячныя намалоты пераўзышлі камбайнеры большасці раёнаў. Характэрна, што ў іх ліку шмат і маладзёжных экіпажаў, а ў камунальным сельскагаспадарчым унітарным прадпрыемстве “Саўгас “Камінтэрн” Буда-Кашалёўскага раёна іх ужо два. Усяго ў вобласці па тысячы тон хлеба і больш намалаціў 21 экіпаж камбайнераў.
Стараннасцю ў працы вызначаюцца і вадзіцелі аўтамабіляў, якія адвозяць збожжа ад камбайнаў — 43 з іх перавезлі ўжо больш за тысячу тон хлеба.
Вобразна кажучы, хлебны каравай вобласці працягвае набіраць вагу. На ўчарашні дзень было намалочана 583539 тон хлеба, а летась на гэту дату намалот склаў 273458 тон.
Сцяпан БАЛОТКІН