За тонай — тона, за гектарам — гектар

Лепшыя камбайнеры камунальнага сельскагаспадарчага унітарнага прадпрыемства “Судкова” Хойніцкага раёна Сяргей Брухавецкі і Рыгор Сцішанок першымі вывелі
ў поле новыя камбайны “КЗС-10К”. З планавых тысячы гектараў у гаспадарцы абмалочана палавіна. Па прыкладу перадавікоў выдатна працуюць усе камбайнеры гаспадаркі. Асабліва стараецца маладзёжны экіпаж у саставе Дзмітрыя Стольнікава і Дзяніса Сянько.
— Хлопцы добра падрыхтавалі да жніва старэнькі “Дон-1500”, які мы хацелі спісваць, — расказвае дырэктар сельгаспрадпрыемства А. А. Сцішанок. — І зараз дабіваюцца высокіх намалотаў. На сённяшні дзень трымаюць першае месца ў раёне сярод маладзёжных экіпажаў.
Як паведаміў Анатоль Аляксеевіч, для камбайнераў створаны ўсе неабходныя ўмовы для плённай працы. Арганізавана бесперабойная работа на сушыльнай гаспадарцы. Усе ўдзельнікі жніва забяспечаны гарачымі абедамі. Штодзённа ў гонар перадавых механізатараў каля канторы гаспадаркі і ў машынна-трактарным парку ўздымаюцца чырвоныя сцяжкі працоўнай славы. Людзі стараюцца. З гектара намалочваюць да 35 цэнтнераў збожжа, а ячмень дае да сарака цэнтнераў.
— У цэлым па раёну намалоты перавышаюць дваццаць цэнтнераў з гектара, — гаворыць начальнік упраўлення сельскай гаспадаркі і харчавання райвыканкама І. В. Праказаў. — А гэта значыць, што на прагнозныя паказчыкі выйдзем. Але ёсць праблемы. Сёлета па лізінгу з “Гомсельмаша” атрымалі толькі пяць камбайнаў, а патрэбу маем у некалькі разоў большую. Просім аблсельгасхарч выдзяляць нам больш тэхнікі. І не толькі збожжаўборачнай. У многіх нашых гаспадарках ёсць камбайнеры, якія на сельмашаўскіх камбайнах намалацілі ўжо больш за пяцьсот тон збожжа. А на “Донах” такіх паказчыкаў няма.
У цэлым з дзесяці тысяч гектараў збажыны ў раёне ўбрана ўжо амаль чатыры тысячы. Тэмпы ўборачных работ з кожным днём павялічваюцца.
— Арганізавана вядуцца ўборачныя работы таксама ў Брагінскім, Рэчыцкім, Гомельскім і некаторых іншых раёнах, — зазначае старшыня абласнога камі-тэта прафсаюза работнікаў АПК М. І. Садчанка. — Там добра прадумана аплата працы ўдзельнікаў жніва. Яны двойчы ў суткі забяспечаны гарачым харчаваннем, а ў асобных гаспадарках і па тры разы. Захоўваюцца праві-лы тэхнікі бяспекі. Прафсаюзныя актывісты дапамагаюць кіраўніцтву і спецыялістам гаспадарак падводзіць вынікі працоўнага спаборніцтва і арганізоўваць культурныя праграмы.
Сцяпан БАЛОТКІН