Бульба ў пашане

У адкрытым акцыянерным таварыстве “Ціхінічы” Рагачоўскага раёна ў сціслыя тэрміны і на высокім агратэхнічным узроўні правялі сяўбу ранніх яравых культур, а затым закончылі пасадку бульбы і прыступілі да апрацоўкі пасеваў.
Гэта культура вырошчваецца на вялікіх плошчах, якія пашыраюцца. Вось і сёлета пад другі хлеб адве-
дзена 200 гектараў, або на сорак больш, чым было летась. З гектара плануецца накапаць да трохсот цэнтнераў клубняў.
— У нас няма праблем з рэалізацыяй бульбы, — гаворыць дырэктар гаспадаркі В. В. Палуян. — Амаль усю яе прадавалі восенню і мелі добры прыбытак. Зараз узводзім сваё бульбасховішча. У выніку можам рэалізоўваць клубні ад ураджаю да ўраджаю на працягу года і мець больш высокія даходы.
Як паведамілі ў райсельгасхарчы, бульба ў пашане не толькі ў “Ціхінічах”, а і ў сельскагаспадарчых вытворчых кааператывах “Вялікія Стралкі”, “Гарадзец”, “Гадзілавічы”, многіх іншых гаспадарках раёна. Зараз пасадку яе ў раёне заканчваюць. Асобныя сельгаспрадпрыемствы на гэтым тыдні прыступаюць ужо і да апрацоўкі пасеваў. У раёне плануюць павялічыць валавы збор клубняў у параўнанні з леташнім на дваццаць працэнтаў.
С. ДАРОЖНЫ