Хуткая дапамога пасевам

Пасевы азімых культур у камунальным сельскагаспадарчым унітарным прадпрыемстве “Саўгас “Кармянскі” Кармянскага раёна пашыраны да 1100 гектараў. Яны былі пасеяны па інтэнсіўных тэхналогіях
з патрэбнай дозай запраўкі мінеральнымі ўдабрэннямі, таму добра перазімавалі.
Каб замацаваць развіццё раслін, іх нядаўна дадаткова падкармілі азотнымі тукамі. Не марудзячы пачалі і хімічную праполку. З гэтай работай паспяхова спраўляецца механізатар Міхаіл Лашкевіч. Ужо на гэтым тыдні ён павінен прыступіць і да апрацоўкі пасеваў яравых збожжавых і зернебабовых па ўсходах, якія ў аптымальныя тэрміны і якасна пасеялі на 775 гектарах. Паралельна Міхаіл Здараўцоў сее аднагадовыя сумесі.
Механізатары Аляксей Ціханенка і Сяргей Міроненка, якія ўносяць удабрэнні пад кукурузу, бульбу, караняплоды, іншыя больш познія яравыя культуры, штодзённа выконваюць работы прыкладна на 150 гектарах.
Дырэктар саўгаса Я. М. Вараб’ёў адзначыў, што правядзенне пасяўной кампаніі на высокім агратэхнічным узроўні дазволіць павялічыць ураджайнасць. Запланавана намалаціць збожжа на 700 тон больш, чым летась.
С. ДАРОЖНЫ