СЕЙБІТЫ ВЫЙШЛІ Ў ПОЛЕ

Сёлетняя вясна паднесла хлебаробам сюрпрызы. Яшчэ ў пачатку сакавіка было халодна, а ўжо ў сярэдзіне месяца з’явілася магчымасць для вядзення палявых работ. Сяўбу ранніх збожжавых і зернебабовых культур адначасова пачалі адразу дванаццаць раёнаў.
Урачыста пачалася сяўба ў камунальным сельскагаспадарчым унітарным прадпрыемстве “Судкова” Хойніцкага раёна (на здымку). Зараз тут працуе некалькі сеяльных агрэгатаў. На ўчарашні дзень у раёне было пасеяна ўжо больш як 130 гектараў.
З кожным днём набірае тэмпы сяўба ў Петрыкаўскім, Ельскім, Лельчыцкім і Рэчыцкім раёнах.
Сёлета ў Рэчыцы адбудуцца рэспубліканскія дажынкі, таму, як адзначыў старшыня Рэчыцкага райвыканкама А. В. Баранаў, збожжаваму полю тут удзяляюць асаблівую ўвагу. Калі летась пры ўраджайнасці 34,4 цэнтнера збожжа з гектара намалацілі нямногім больш як 90 тысяч тон, то сёлета маюць намер павялічыць ураджайнасць да 40 цэнтнераў, а па валавому збору хлеба пераўзысці рубеж у сто тысяч тон.
Пра гэта кіраўнікам і спецыялістам сельскіх гаспадарак Аляксандр Васільевіч расказаў у хо-дзе выязнога пасяджэння выканкама. Яно нядаўна было праве-дзена на базе гаспадарак, якія актыўна вядуць пасяўныя работы па інтэнсіўных тэхналогіях. Трэба адзначыць, што па ўра-джайнасці і валавому намалоту збожжа на працягу некалькіх гадоў Рэчыцкі раён займае першае месца ў вобласці і зараз упэўнена закладвае трывалую аснову будучаму ўраджаю.
Нягледзячы на неспрыяльныя ўмовы мінулай зімы, на вясну добра выйшлі і азімыя культуры, якія займаюць 213 тысяч гектараў. У большасці гаспадарак прыступілі да іх баранавання і падкормкі азотнымі ўдабрэннямі. У комплексе вядуцца ўзорванне і культывацыя глебы, запраўка мінеральнымі і арганічнымі ўдабрэннямі. Усяго сёлета хлебаробы Гомельшчыны пасеюць 353 тысячы гектараў яравых культур, у тым ліку 152,9 — ранніх збожжавых і зернебабовых.
Сцяпан БАЛОТКІН
Фото БЕЛТА