Кашалёк набіваюць... каровы

Мяняе аблічча вёска Губічы — цэнтр сельскагаспадарчага вытворчага кааператыва з аднайменнай назвай. За апошнія чатыры гады ад папярэдніх выбараў у мясцовыя Саветы дэпутатаў гэтая гаспадарка ў Буда-Кашалёўскім раёне зрабіла найбольш прыкметны крок наперад па ўсіх напрамках сваёй дзейнасці. Падвоіліся вытворчасць малака і мяса, а таксама рэалізацыя гэтай прадукцыі дзяржаве. Больш як у два разы павялічыўся сярэдні надой ад каровы і дасягнуў пяці тысяч кілаграмаў. Больш вырошчваецца і прадаецца дзяржаве прадукцыі раслінаводства, у тым ліку гародніны. Агульная гадавая выручка перавышае тры мільярды рублёў. Прыкметна павялічваецца і чысты прыбытак, асабліва ад малака, рэнтабельнасць якога пастаянна павышаецца. Таму павялічваецца і заработная плата вяскоўцаў. Вобразна кажучы, за мінулыя гады кашалькі ў работнікаў кааператыва патаў-сцелі амаль у два разы.
Значную частку прыбытку кааператыў накіроўвае на стварэнне добрых умоў працы, адпачынку і быту вяскоўцаў. Толькі сёлета капітальна адрамантаваны і па-сучаснаму абсталяваны пакой адпачынку жывёлаводаў, заасфальтавана частка тэрыторыі фермы. Зроблена выгульная пляцоўка, наведзены парадак у кароўніках і цялятніках.
Аб гэтым напомнілі жывёлаводам на перадвыбарным сходзе старшыня СВК М. А. Рыбік і старшыня прафкама Л. І. Кузьмянкова. Па-дзелавому вялася гаворка аб далейшым умацаванні эканомікі сельгаспрадпрыемства і паляпшэнні жыцця вяскоўцаў. У рабоце сходу прынялі таксама ўдзел прадстаўнікі абкама прафсаюза работнікаў АПК.
С. ДАРОЖНЫ