Весялілі калядоўшчыкі... цялятак і рагуль

Са старадаўніх часоў дайшоў да нашых дзён прыгожы абрад славянскіх народаў — калядаванне. Пераапранутыя ў казачных персанажаў калядоўшчыкі з песнямі і жартамі хадзілі ад хаты да хаты, славячы руплівага гаспадара, увішную гаспадыню-прыгажуню ды іх разумных дзетак...
На гэтым тыдні, калі вечары кароткіх зімовых дзён памечаны Святкамі, калядоўшчыкі асабліва жартаўлівыя і пацешныя. У вёсцы Чырвоная Слабада Акцябрскага раёна, дзе давялося пабываць два дні таму, ражаныя сустрэлі нас нават на малочнатаварных фермах КСУП “Чырвонаслабодскі”. З гармонікам і бубнам, вясёлымі прыпеўкамі яны сустракалі кожнага, хто завітае ў гаспадарку. Здзівілі святочным убранствам і жывёлагадоўчыя памяшканні — чыста прыбраныя, упрыгожаныя галінкамі елкі і сасны, рознакаляровымі гірляндамі. Нават музыка з дынамікаў неслася пад дахам кароўнікаў, “цешачы” цялятак і рагуль, з апетытам паядаючых смачны сілас.
Як высветлілася, у Акцябрскім раёне ў апошнія гады праводзіцца конкурс на лепшае архітэктурна-мастацкае афармленне будынкаў і тэрыторый, прыўрочаны да святаў Новага года і Каляд. Удзел у конкурсе прымаюць арганізацыі, прадпрыемствы, установы, сельскагаспадарчыя арганізацыі ўсіх форм уласнасці. Па шасці намінацыях падводзяцца вынікі і вызначаюцца пераможцы. Вось і КСУП “Чырвонаслабодскае” заняло першае месца сярод сельгаспрадпрыемстваў. А як жа справы з надоямі малака на фермах гаспадаркі? Паспяшаюся супакоіць — тут умеюць не толькі спяваць ды танцаваць, але і працаваць. Зараз надоі малака складаюць 11 — 12 кілаграмаў у суткі, што з`яўляецца адным
з лепшых паказчыкаў у раёне.
Самадзейных артыстаў для ўдзелу ў конкурсе не прыйшлося шукаць далёка. Імі сталі даяркі, даглядчыцы маладняку, ветурачы і іншыя працаўнікі ферм. Але вяскоўцы пераканаліся — працавітыя ды творчыя людзі да ўсяго здатныя!
Мікалай БЯЛЬКОВІЧ