Не спалохаюць халады і маразы

Нараўлянскі раён зрабіў значны крок наперад у галіне грамадскай жывёлагадоўлі. Ужо сёлета тут набліжаюцца да чатырохтысячнага рубяжа па надоях малака ад каровы. Рост у параўнанні з папярэднім годам складзе каля паўтоны.
Характэрна, што жывёлаводы дабіваюцца прыбаўкі прадукцыі пастаянна, як летам, так і зімой. Вось і ў гэтыя дні ў сярэднім ад каровы яны атрымліваюць прыкладна па дзесяць кілаграмаў малака, або па 1,3 — 1,4 кілаграма больш, чым у адпаведныя дні летась.
Тут своечасова падрыхтаваліся да пераводу грамадскага пагалоўя да стойлавага перыяду і зараз вядуць работы па зімоваму распарадку дня. Жывёле выдаюцца паўнацэнныя рацыёны, бо кармоў назапашана значна больш, чым летась. Лепшая іх якасць і пажыўнасць. Адрамантаваны і ўцеплены жывёлагадоўчыя памяшканні. На фермах створаны належныя ўмовы для працы, быту і адпачынку людзей.
У гэтым пераканаліся і ўдзельнікі абласнога семінара-нарады па пытаннях арганізацыі зімова-стойлавага ўтрымання жывёлы і стварэння неабходных умоў для работы людзей, які нядаўна быў праведзены ў Нараўлянскім раёне. Паўсюдна назіраюцца добрыя змены ў арганізацыі работ і высокія паказчыкі. У СВК “Чырвоны баец” і КСУП “Кіраўскае” за апошнія два гады рэзка ўзраслi пагалоўе буйной рагатай жывёлы, у тым ліку і кароў, а таксама прадуктыўнасць статка. Толькі сёлета за дзесяць месяцаў прыбаўка перавышае 20 працэнтаў у параўнанні з леташнім. Праглядваюцца і добрыя перспектывы.
На пленарным пасяджэнні памочнік Прэзідэнта Рэспублікі Беларусь — галоўны інспектар па Гомельскай вобласці В. У. Шчэцька падкрэсліў, што ў сувязі з катастрофай на ЧАЭС у раёне адчуваецца недахоп спецыялістаў, кадраў масавых прафесій у жывёлагадоўлі, ёсць іншыя цяжкасці, але людзі супрацьпастаўляюць ім стараннасць, арганізаванасць. Таму і справы тут ладзяцца. Лепшы вопыт нараўлянскіх жывёлаводаў рэкамендавана абагульніць і распаўсюдзіць у іншых раёнах.
Сцяпан БАЛОТКІН