“Лутаву” слухалі “Песняры”

Народны гурт “Лутава” вядомы
на Лоеўшчыне як захавальнік старадаўніх песень, двойчы лаўрэат фестываляў “Беларусь — мая песня”.
Унікальны ён сваёй самабытнай манерай спеваў, сугучнасцю галасоў, для якіх і акампанемент не патрэбен. У лістападзе 2007-га “Лутава” адзначыць 20-годдзе. Адметна, што ўвесь гэты час асноўная частка калектыву застаецца нязменнай.
Кіраўнік гурта Тамара Шапавал здолела сабраць вакол сябе ўлюбёных у фальклор роднай зямлі жанчын з вёсак Старая і Новая Лутава, Глушэц. У іх рэпертуары шмат рэдкіх песень, у тым ліку і абрадавых — калядных, валачобных, купальскіх, русальных...
Самі “Песняры” захацелі паслухаць “Лутаву”, каб з глыбінь жыватворных “зачэрпнуць” для сябе самае меладычнае і кранаючае. Сустрэча адбылася ў час святкавання 501-га дня нараджэння Лоева. Трэба было бачыць, з якім захапленнем і зачараваннем слухалі лутаўчанак удзельнікі ансамбля! “Выдатна!” — такую ацэнку ў свой адрас чулі спявачкі літаральна пасля кожнай песні. І апладзіравалі ім знакамітыя “Песняры” ад душы! “Лутава” як самых дарагіх гасцей запрасіла “Песняроў” завітаць на святкаванне свайго 20-годдзя.
Тамара КРУЧЭНКА
Фото БЕЛТА