Сейбіты на аддаленых палях

На карце Добрушскага раёна сельскагаспадарчы вытворчы кааператыў “Кругаўскі” займае асаблівае месца — найбольш пацярпелы ад чарнобыльскай катастрофы і па ўсіх параметрах самы меншы. Хлебаробы прыязджаюць сюды на работу разам са старшынёй М. У. Дзеркачовай.
— Людзей у нас працуе значна менш, чым у любой іншай гаспадарцы, — зазначае Марыя Уладзіміраўна. — Але неадкладныя палявыя сельскагаспадарчыя работы не зацягваем. Заўсёды праводзім іх хутка і на высокім агратэхнічным узроўні. Яшчэ толькі закончылі жніво, а ўжо прыступілі ў ліку самых першых гаспадарак раёна да сяўбы азімых культур.
Права пачаць пасяўныя работы прадастаўлена лепшаму сеяльнаму экіпажу ў саставе Мікалая Мікалаевіча Плешава і Мікалая Паўлавіча Курачкіна. Мяркуюць засяваць да сарака гектараў за змену пры высокай якасці. У бліжэйшы час да работы падключацца яшчэ два сеяльныя агрэгаты.
Адначасова высокімі тэмпамі вядуцца работы па ўзорванню і культывацыі глебы, унясенню мінеральных удабрэнняў пад азімае жыта. Стараннасцю ў працы вызначаюцца Уладзімір Іванавіч Горбаў, Аляксандр Уладзіміравіч Зваротны, іншыя механізатары, якія дзённыя заданні выконваюць больш як на 150 працэнтаў.
— Сёлета нам трэба пасеяць жыта амаль на тысячы гектарах, — расказвае аграном Н. І. Маёрава. — Больш палавіны гэтай плошчы падрыхтавана ўжо, а да канца тыдня павінны закончыць работу на астатняй. У цэлым жа асеннюю сяўбу пастараемся завяршыць не пазней 20 верасня. Хаця землі па сваіх пажыўных якасцях вельмі бедныя, мяркуем на круг атрымаць звыш 20 цэнтнераў збожжа і не менш як на дзесяць працэнтаў у параўнанні з сёлетнім павялічыць яго валавы збор.
Сцяпан БАЛОТКІН