Услаўлялі Слова ў Паставах

Абноўлены, памаладзелы, з адрэстаўрыраванымі будынкамі і вуліцамі сустрэў нас райцэнтр Паставы на Віцебшчыне — сёлетні гаспадар Дня беларускага пісьменства. Сімвалічна, што менавіта тут, па-суседству з Полаччынай, адкуль пайшло асветніцтва і першадрукарства, ушаноўвалі мы яго вялікасць Слова. На Віцебшчыне гэтае свята гасцявала ўжо ў чацвёрты раз. Прыкметна, што ў краі выдаецца звыш 130 газет, 22 з іх — дзяржаўныя.
На цэнтральнай плошчы гарадка вочы разбягаліся ад шматколернасці прадстаўленых выданняў. Тут адбыўся фестываль кнігі і прэсы з удзелам пісьменнікаў, журналістаў, выдаўцоў. Бралі ўдзел у шматлікіх сустрэчах і члены грамадскага аб’яднання “Саюз пісьменнікаў Беларусі” з Гомельшчыны — драматург Васіль Ткачоў, паэты Алена Кобзева, Святаслаў Крупенька.
Сонечны, цёплы вераснёўскі дзень паўплываў на настрой усіх, хто рознымі шляхамі-пуцявінамі, з усіх куточкаў Беларусі прыехаў, каб засведчыць сваю цікавасць і павагу да мінулага, каго цікавяць сённяшнія набыткі ў паліграфіі, журналістыцы, духоўнай сферы.
Сімвал праваслаўя — Агонь ад Гроба Гасподняга са Свята-Духава кафедральнага сабора Мінска — быў дастаўлены ў Паставы. Таму вельмі шматлюдна было каля мясцовай царквы, дзе адбылася святочная літургія і быў пасаджаны сад малітвы. Гасцінна запрашалі пастаўчан і гасцей горада паспяваць і патанцаваць шматлікія фальклорныя калектывы, народныя майстры прапанавалі непаўторную кераміку, вырабы з саломкі ў сваім “горадзе”. Цэлыя вуліцы ў цэнтры Пастаў былі запоўнены імправізаванымі кафэ і рэстаранчыкамі.
А ўрачыстае адкрыццё свята праходзіла ў маляўнічым парку, на галоўнай сцэнічнай пляцоўцы. Старшыня аргкамітэту па падрыхтоўцы і правядзенню Дня беларускага пісьменства намеснік прэм’ер-міністра Рэспублікі Беларусь Аляксандр Мікалаевіч Косінец агучыў тэкст віншавання ўдзельнікаў свята ад Прэзідэнта нашай краіны. Яркай, запамінальнай стала цырымонія ўзнагароджання лаўрэатаў 46-га рэспубліканскага конкурсу “Мастацтва кнігі” (упершыню яму нададзены статус нацыянальнага), уручэнне ганаровых знакаў-сімвалаў “Залаты фаліянт”. Найвышэйшую ўзнагароду — дыплом імя Францыска Скарыны і “Залаты фаліянт” журы прысудзіла двухтомніку “Победа: 1418 дней Великой Отечественной войны”, “Память со слезами на глазах” выдавецтва “Мастацкая літаратура”. Міністр інфармацыі Рэспублікі Беларусь Уладзімір Русакевіч, уручаючы ўзнагароды творцам, падкрэсліў: “Гэтай дзеяй мы аддаём даніну павагі першадрукарам, нашым асветнікам Еўфрасінні Полацкай, Кірылу Тураўскаму, Францыску Скарыне, Сымону Буднаму, усім тым, хто працаваў і працуе на ніве кнігадрукавання, на ніве пісьменства — аснове нашай многавяковай нацыянальнай культуры.”
Тамара КРУЧЭНКА