Гомельскія дарогі вядуць у... джунглі

Яшчэ ў канцы мінулага года генеральны дырэктар камунальнага праектна-рамонтна-будаўнічага унітарнага прадпрыемства “Гомельаблдарбуд” В. М. Краўчанка ў саставе беларускай дэлегацыі пабываў у Індыі. Вадзім Міхайлавіч сустракаўся з прадстаўнікамі дарожнай галіны гэтай краіны.
Папярэдне вяліся перамовы аб узаемавыгадным супрацоўніцтве, магчыма нават аб стварэнні сумеснага прадпрыемства па будаўніцтву і капітальнаму рамонту індыйскіх дарог. Прадоўжыць гэту важную тэму было вырашана пры сустрэчы зацікаўленых бакоў у Гомелі.
Нядаўна такая сустрэча адбылася. У ходзе афіцыйнага візіту ў Беларусь тры дні з работай “Гомельаблдарбуда” знаёміліся дырэктары буйных індыйскіх дарожных фірмаў Рахіт Сінгх і Аніруд Лол. Госці пабывалі на асобных дарогах, якія будавала і рамантавала прадпрыемства, азнаёміліся з асаблівасцямі ямачнага рамонту, іншымі перадавымі тэхналогіямі. Па словах прадстаўнікоў замежнай краіны, ім вельмі спадабалася і дарожная тэхніка, якая выкарыстоўваецца ў “Гомельаблдарбудзе”. Яны выказалі жаданне набыць некалькі спецмашын і механізмаў.
Паўдня правялі госці ў комплексе дапаможных цэхаў. Тут жа на базе прадпрыемства азнаёміліся і з работай навейшага асфальтабетоннага завода.
— Зараз у нашай краіне адным з прыярытэтных кірункаў развіцця эканомікі з’яўляецца дарожнае будаўніцтва, — зазначыў Рахіт Сінгх. — І гэта не выпадкова. Эканоміка Індыі ў апошнія гады дынамічна развіваецца. Недахоп аўтамабільных дарог з’яўляецца сур’ёзным тормазам на шляху да гэтага. Сітуацыя зараз такая — за апошнія гады колькасць аўтамабіляў павялічылася прыкладна ў 170 разоў, а працягласць дарог узрасла не больш як у дзесяць разоў. Урад вырашыў значна скараціць такую прапорцыю. На будаўніцтва і рамонт дарог выдзяляюцца вялікія сумы інвестыцый. У першую чаргу значныя грашовыя сродкі выдзяляюцца з дзяржаўнага бюджэту. Паступаюць інвестыцыі таксама з-за мяжы. Нават японцы на гэтыя мэты абяцаюць выдзеліць вялікія капіталаўкладанні. Іх трэба хутка асвойваць. Мы прыехалі сюды, каб дамовіцца з гамяльчанамі аб сумеснай рабоце па асваенню часткі інвестыцыйных сродкаў. У надзейнасці вашых дарожнікаў, іх магчымасцях і вялікім патэнцыяле пераканаліся на месцы. Прапаноўваем сумесна распрацаваць варыянты нашага супрацоўніцтва.
А вось што дадаў да гэтага В. М. Краўчанка:
— Пакуль аб канкрэтных напрацоўках гаварыць рана. Але перспектыва сумеснай работы праглядваецца. І сваіх шанцаў пастараемся не ўпусціць.
Некаторыя ўдзельнікі сустрэчы выказвалі нават прагнозы аб тым, што ўжо хутка гомельскія, найбольш вопытныя дарожнікі будуць пракладваць новыя дарогі праз індыйскія джунглі.
Сцяпан БАЛОТКІН