На раскачку часу няма

На пасяджэнні абласной селектарнай нарады, якую вёў першы намеснік старшыні аблвыканкама Г. В. Дашкевіч, у комплексе разглядалася работа аграпрамысловага сектара рэгіёна.
— У гэтыя летнія дні для нас усе работы вельмі важныя, — адзначыў Георгій Віктаравіч. — Чакаецца нялёгкая барацьба за вырашчаны ўра-джай. На гэтым і трэба сканцэнтраваць усе рэзервы і магчымасці.
Далей Г. В. Дашкевіч напомніў, што летась хлебаробы Гомельшчыны намалацілі ўпершыню больш мільёна тон збожжа. Сёлета неабходна замацаваць дасягнутае.
Інфармацыю аб стане спраў на збожжавым полі вобласці даў намеснік старшыні аблсельгасхарчу
В. І. Яцэвіч. Як ён паведаміў, трэба ўбраць 344 тысячы гектараў збожжавых і зернебабовых культур. Складанасць жніва заключаецца ў тым, што тэрміны паспявання хлеба ў сувязі са спякотай расцягнуліся на некалькі дзён. Бывае нават, што на адным і тым жа полі на завышаных участках збожжавыя трэба тэрмінова абмалочваць, а на іншых яны застаюцца павышанай вільготнасці. Улічваючы мясцовыя ўмовы і фактары, трэба ўмела манеўраваць людзьмі і тэхнікай. У гэтым плане належным чынам разгортваюць уборачныя работы ў Акцябрскім, Петрыкаўскім, Ельскім, Гомельскім і некаторых іншых раёнах. З кожным днём тут усё больш гаспадарак уключаецца ў жніво. Аднак у некаторых сельгаспрадпрыемствах зацягваюць абмалот ранніх збожжавых культур, неапраўдана дапускаюць раскачку, не ўбіраюць нават падгарэўшыя ўчасткі. А гэта ў канечным выніку можа прывесці да вялікіх страт. Таму неадкладна трэба папраўляць становішча.
Уздымалася пытанне і аб тым, што сёлета, больш чым летась, узнікае праблем з гаруча-змазачнымі матэрыяламі. На ўзроўні абласных структур прымаюцца ўсе неабходныя меры, каб гэтыя праблемы хутка выправіць.
На селектарнай нарадзе падкрэслівалася, што травы першага ўкосу ў вобласці паўсюдна скошаны. Нарыхтавана кармоў больш, чым на гэты час летась. Але назапашванне іх трэба працягваць з траў другога ўкосу і яравой саломы.
Узнімаліся таксама пытанні своечасовай выплаты заработнай платы вяскоўцам.
Сцяпан БАЛОТКІН