Прымай у падарунак трактар!

Нядаўна старшыня праўлення ААТ “Белаграпрамбанк” С. М. Румас падарыў ключы ад новенькага трактара маркі МТЗ-82-1 Капаткевіцкаму дому-інтэрнату для састарэлых і інвалідаў. Аб гэтым у казённай установе, што на Петрыкаўшчыне, марылі даўно...
Справа ў тым, што адзінаму старэнькаму трактару дома-інтэрната каля двух дзесяткаў год. А вядзенне дапаможнай гаспадаркі — адзін з напрамкаў дзейнасці гэтай установы. Прычым вельмі патрэбны і карысны, бо тычыць смаку інтэрнатаўскіх абедаў і мажлівасці зарабіць яго жыхарам дадатковыя да пенсіі грошы. Стары трактар часта ламаўся і стаяў на рамонце. А без тэхнікі ў полі як без рук... Таму і звярнуўся Капаткевіцкі дом-інтэрнат за дапамогай да свайго дэпутата Палаты прадстаўнікоў Нацыянальнага сходу Рэспублікі Беларусь М. І. Русага. Той паабяцаў дапамагчы землякам.
І вось нядаўна з гэтай нагоды тут адбылося сапраўднае свята: з традыцыйным уручэннем хлеба-солі ганаровым гасцям, канцэртам і радасцю жаданага падарунка. Ва ўрачыстых абставінах ключы і дакументы ад новага трактара, набытага за кошт ААТ “Белаграпрамбанк”, уручаны намесніку дырэктара Капаткевіцкага дома-інтэрната С. А. Каўшуну.
— Няхай ён верна служыць дзеля дабрабыту і заможнасці вашай установы! — пажадаў старшыня праўлення банка С. М. Румас.
Дырэкцыя дома-інтэрната выказала сардэчную падзяку М. І. Русаму і С. М. Румасу за такі каштоўны падарунак. Шчыра дзякавалі за яго і жыхары гэтай установы. Зараз тут маецца рэальная магчымасць павялічыць плошчы вырошчвання сельгаскультур і аказваць больш поўную дапамогу працаўнікам поля.
М. ГАЙНА