Разам з дажджом пацяклі і малочныя рэкі

Сёлетняе лета няўстойлівае, амаль штодзённа ідуць дажджы. Але, як вобразна зазначаюць работнікі жывёлагадоўчых ферм Буда-Кашалёўскага раёна, разам з дажджамі прыкметна папаўняюцца і малочныя рэкі.
Старшыня райвыканкама М. І. Чарныш расказаў, што зараз у суткі ад каровы надойваюць па 13 кілаграмаў малака, а ў многіх гаспадарках — нават больш як па пуду. Такіх высокіх паказчыкаў ніколі раней не было.
Пры гэтым значныя тэмпы прыросту прадукцыі характэрны не толькі для перадавых сельгаспрадпрыемстваў, а і для тых, якія раней хадзілі ў адстаючых. Напрыклад, па 18,2 кілаграма малака ў суткі атрымліваюць ад каровы пастаянны лідэр спаборніцтва сельскагаспадарчы вытворчы кааператыў “Крыўск” і яшчэ нядаўні сераднячок — СВК “Нікалаеўка”. У абедзвюх гаспадарках прыбаўка малака ў параўнанні з мінулагоднімі паказчыкамі складае амаль тры кілаграмы. А ў “Юбілейным” у суткі гэта прыбаўка перавышае 4 кілаграмы.
Больш як па пуду малака надойваюць і ў “Губічах”, што значна вышэй, чым было ў адпаведныя дні летась.
Безумоўна, поспеху нямала садзейнічае пастаяннае фарміраванне ў гаспадарках раёна высокапрадуктыўнага статка і ўкараненне інтэнсіўных тэхналогій догляду жывёлы. Разам з тым і “нябесная канцылярыя” дапамагае. У выніку спорных дажджоў вельмі хутка адрастаюць і травы. Жывёла паядае іх удосталь,таму і прадуктыўнасць яе рэзка павышаецца.
Дажджы садзейнічалі і росту траў на сенажацях. Але нарыхтоўку кармоў на зіму яны зараз стрымліваюць. У раёне прымаюцца меры па паскарэнню работ і ў непагодлівых умовах за кошт высокай арганізацыі працы, умелай манеўранасці людзьмі і тэхнікай, выкарыстання кожнай мінуты рабочага часу. З нагоды гэтага пазаўчора праведзены раённы се¬мінар па корманарыхтоўцы і па пытаннях далейшага павышэння прадуктыўнасці грамадскай жывёлы.
Сцяпан БАЛОТКІН