Куды пастух, туды і юрта

Калі вы думаеце, што юрты для часовага або пастаяннага пражывання выкарыстоўваюцца толькі ў стэпах Сярэдняй Азіі або Манголіі, то памыляецеся. Яны ёсць і на ўчастках культурнай пашы ў сельскагаспадарчым вытворчым кааператыве “Крыўск” Буда-Кашалёўскага раёна.
У гэтай вёсцы і навакольных пасёлках жыве шмат перасяленцаў з іншых рэгіёнаў Беларусі, рэспублік былога Саюза, у тым ліку з Казахстана і Таджыкістана. Яны хутка пасябравалі з карэннымі жыхарамі, прызвычаіліся да мясцовых умоў. Усё лепшае ў рабоце і жыцці пераймаюць у прыезджых людзей і беларусы. Адзін з наглядных прыкладаў гэтаму і юрты. Але ўсё па парадку. СВК “Крыўск” у апошнія гады выйшаў у лік перадавых гаспадарак раёна, а па асобных пазіцыях і вобласці. Тут пастаянна вырошчваюцца высокія ўраджаі збожжавых і кармавых культур, расце вытворчасць прадукцыі жывёлагадоўлі, асабліва малака. У гэтыя чэрвеньскія дні ў сярэднім ад каровы за суткі надойваецца больш за 17 кілаграмаў малака, на тры кілаграмы больш, чым у адпаведныя дні летась. А вось Ніна Жывадзёрава, Ганна Краснікава, Алена Залеская і некаторыя іншыя перадавыя даяркі атрымліваюць да 20 кілаграмаў малака ад каровы за суткі.
У немалой ступені поспеху работнікаў малочнатаварнай фермы садзейнічае тое, што грамадскае пагалоўе своечасова пераведзена на кругласутачнае пашавае ўтрыманне. Травы на пашы выдатныя, каровы ўдосталь паядаюць зеляніны. Ёсць побач вада і соль. Для абагачэння рацыёнаў пажыўнымі рэчывамі і вітамінамі завозяцца адходы цукровай вытворчасці. Няма праблем і з пастухамі. Для работы вахтавым метадам падабраны вопытныя людзі. А дзе ім жыць? Практыкавалі раней розныя будкі, шалашы, невялікія крытыя збудаванні, нават вагончыкі. Было нязручна. Вось тут перасяленцы з Сярэдняй Азіі і прапанавалі выкарыстаць... юрты. Падобнага матэрыялу, як, напрыклад, у Казахстане, не знайшлі. Тады зрабілі юрты на аснове металу. Яны не працякаюць. У іх утульна, цёпла.
— Нам зараз непагадзь і дажджы зусім не страшныя, — расказвае пастух-даглядчык Аляксей Дворак. — З дапамогай трактара механізатар Дзяніс Зіновенка, які абслугоўвае пашу, можа перамясціць юрту ў любое месца.
Аляксей звяртае ўвагу і на той факт, што ў юрту ўманціравана печка. Можна грэць чай, гатаваць гарачую ежу. Тым больш што кааператыў выдзяляе пастухам бясплатна мяса, малако, гародніну, іншыя прадукты харчавання.
— А яшчэ па прыкладу казахскіх чабаноў мы ўзялі сабе ў дапамогу каня, — дапаўняе свайго калегу па рабоце Пётр Хількевіч. — Трэба, напрыклад, кароў завярнуць або нешта даставіць па нізіннай мясцовасці — ён выручае.
Сцяпан БАЛОТКІН