І зорку на небе сваю адшукаць...

Хто ў юнацкія гады не марыць аб шчаслівай зорцы, што павядзе па жыццёвай дарозе, дапаможа здейсніць самыя зайздросныя планы? Не выключэнне ў гэтым сэнсе і вучні сярэдняй школы № 41 горада Гомеля. Выпускнікі сёлетняга года ўжо праз два месяцы пакінуць родную школу, многія будуць трымаць уступныя іспыты ў вышэйшыя і сярэднія навучальныя ўстановы.
А пакуль жа на ўроку астраноміі, які вядзе дырэктар школы В. А. Лазечны, юнакі і дзяўчаты з цікавасцю знаёмяцца з тэлескопам ды ўглядаюцца ў зорнае неба. Віктар Андрэевіч так цікава расказвае пра Сусвет, што школьны ўрок прабягае ўмомант!
Вось ужо 28 гадоў узначальвае ён педагагічны калектыў СШ № 41. Мэтанакіраваная праца настаўнікаў і дырэктара за гэты час прынесла добрыя вынікі. У 1984 і 1989 гадах школа ўзнагароджвалася Граматамі Савецкага камітэта ветэранаў вайны, адна з якіх падпісана легендарным лётчыкам А. Марэсьевым. У 2001 годзе яе калектыў перамог у конкурсе “Лепшая школа горада Гомеля”, а праз год самадзейны танцавальны ансамбль “Каскад” СШ № 41 атрымаў званне “ўзорны”, пацвердзіўшы свой высокі статус у мінулым годзе. Пачынаючы з 1998 года, навучальная ўстанова носіць таксама і статус школы з эстэтычным выхаваннем.
Аб гэтым паведамілі, даслаўшы ліст у рэдакцыю нашай газеты, бацькі вучняў. Многія з іх у свой час таксама вучыліся ў гэтай школе і да сённяшніх дзён збераглі ў сваіх сэрцах цёплыя пачуцці да настаўнікаў і дырэктара. Менавіта з ліста бацькоў мы даведаліся, што на жыццёвым неба¬схіле Віктара Андрэевіча Лазечнага ўчора заззяла зорка ў выглядзе прыгожай лічбы “60”. Вучні, іх бацькі, калегі па працы шчыра павіншавалі юбіляра, пажадаўшы яму адшукаць яшчэ шмат зорак як праз тэлескоп у небе, так і на доўгім шляху жыцця.
Мікалай БЯЛЬКОВІЧ