Зноў наваселле ў паштавікоў

Шмат жыхароў пасёлка “Камунар” Буда-Кашалёўскага раёна сабралася ў мінулую суботу на ўрачыстае адкрыццё новага аддзялення паштовай сувязі.
Павіншаваць вяскоўцаў прыехалі намеснік старшыні райвыканкама
А. І. Алексіна, дырэктар Гомельскага філіяла рэспубліканскага унітарнага прадпрыемства паштовай сувязі “Белпошта” М. М. Кірыенка і начальнік раённага аддзела паштовай сувязі А. А. Дралова.
Ганаровае права перарэзаць чырвоную стужку было прадастаўлена гасцям (на здымку). Адразу ж пасля ўрачыстасцей аддзяленне пачало работу. Увесь неабходны комплекс паштовых паслуг аказваецца тут людзям. Да ўсяго на месцы можна аформіць страхавыя дагаворы, атрымаць неабходныя кансультацыі. Для наведвальнікаў устаноўлены нават камп’ютэр.
— Гэта шостае па ліку новае паштовае аддзяленне, якое адкрыта на працягу апошняга года, а ўсяго іх у нас 670, — паведамляе М. М. Кірыенка. — Ва ўсіх раёнах вобласці выкананы ўжо сацыяльныя стандарты па нашай галіне. Праводзім пэўную работу па камп’ютэрызацыі, павелічэнню паслуг насельніцтву і паляпшэнню іх якасці. Устаноўлена ў падраздзяленнях філіяла больш шасцісот адзінак вылічальнай тэхнікі. Ва ўсіх гарадскіх і часткова ў буйных вясковых аддзяленнях сувязі ёсць паштова-касавыя тэрміналы. Работа па іх устаноўцы працягваецца.
Міхаіл Мікалаевіч звяртае ўвагу і на той факт, што многае робіцца для таго, каб наведвальнікі паштовых аддзяленняў сувязі маглі атрымаць грошы па пластыкавых картках. Заключаны адпаведныя дагаворы з гомельскімі падраздзяленнямі “Белінвестбанка”, “Белаграпрамбанка” і “Белгазпрамбанка”. Паляпшаецца работа літаральна па ўсіх напрамках дзейнасці філіяла, у тым ліку і па арганізацыі падпіскі на перыядычныя выданні.
Дарэчы, у гэты ж дзень у Камунары адбылася сустрэча з падпісчыкамі, у якой прынялі ўдзел прадстаўнікі сродкаў масавай інфармацыі. Характэрна, што пачатак быў пакладзены афармленнем падпіскі на “Гомельскую праўду”, якую выпісалі Зінаіда Мікалаеўна Дароўская, яе дачка Людміла і сын Аляксандр.
Сцяпан БАЛОТКІН